საგარეო საქმეთა მინსტრის მოადგილემ მიხეილ ნინუამ თანამდებობა დატოვა. ამის შესახებ ინფორმაცია On.ge-ს საგარეო საქმეთა სამინისტროში დაუდასტურეს.

მათივე ინფორმაციით, მიხეილ ნინუამ თანამდებობა პირადი განცხადების საფუძველზე დატოვა. უწყებუს ცნობით, ნინუამ სხვა სფეროში საქმიანობის გაგრძელების შეთავაზება დიდი ხნის წინ მიიღო.

როგორც სამინისტროში აღნიშნავენ, სწორედ მიხეილ ნინუას უშუალო ხელმძღვანელობით და ჩართულობით ხორციელდებოდა COVID პანდემიის პირობებში საგარეო საქმეთა სამინისტროს ძირითადი ამოცანების — უცხოეთში მყოფი მოქალაქეების სამშობლოში დაბრუნებისა და ადგილზე მათი დახმარების უზრუნველყოფა.

"აღსანიშნავია, რომ მიხეილ ნინუამ სხვა სფეროში საქმიანობის გაგრძელების შეთავაზება დიდი ხნის წინ მიიღო და გეგმავდა უწყების დატოვებას, თუმცა უძღვებოდა რა პანდემიის ფონზე არსებული ამოცანების გადაჭრის პროცესს, პოსტის დატოვების გადაწყვეტილება მიიღო მხოლოდ აღნიშნული კრიტიკული ფაზის დასრულების შემდეგ. ჩვენ მას განვიხილავთ ჩვენი დიპლომატიური კორპუსის უაღრესად ფასეულ და ღირსეულ წევრად", — აცხადებენ საგარეო საქმეთა სამინისტროში.

მიხეილ ნინუა საგარეო საქმეთა მინისტრის მოადგილედ 2018 წლის ოქტომბრიდან იკავებდა.