ინფექციური პათოლოგიის და შიდსის ცენტრის განცხადებით, COVID-19-ის დროს პლაზმაფერეზით მკურნალობის პირველი მცდელობა წარმატებული აღმოჩნდა.

როგორც კლინიკის განცხადებაშია აღნიშნული, პლაზმაფერეზი გამოიყენეს 60 წლის პაციენტზე, რომელიც კლინიკაში პირველ აპრილს გართულებებით შევიდა. კაცს ჰქონდა ცხელება, ადინამია, ხველა, ყელის ტკივილი, სუნთქვის უკმარისობა, ორმხრივი პნევმონია და სხვა გადახრები.

"პაციენტს უტარდებოდა მკურნალობა ჰიდროქსიქლოროქინით (პლაქვენილით), ანტიბიოტიკებით, ფრაქსიპარინით და სხვ. მკურნალობის პროცესში ხანმოკლე გაუმჯობესების შემდეგ პაციენტის მდგომარეობა კვლავ დამძიმდა. აღენიშნებოდა ჰექტიური ცხელება, სუნთქვის უკმარისობა და სხვ", — განმარტავენ ინფექციურ საავადმყოფოში.

პირველი პლაზმაფერეზი პაციენტს 13 აპრილს ჩაუტარდა, პაციენტის მდგომარეობა შედარებით გაუმჯობესდა, თუმცა სრული ნორმალიზება ვერ მოხდა. როგორც განცხადებაშია აღნიშნული, მეორე პროცედურა უკვე 18 აპრილს ჩატარდა, რის შემდეგაც პაციენტის მდგომარეობა მნიშვნელოვნად გაუმჯობესდა. მათივე თქმით, მაისის პირველ რიცხვებში პაციენტი კლინიკიდან გამოჯანმრთელებული გაწერეს.

"აღნიშნული შემთხვევა იმით არის საინტერესო, რომ საქართველოში პირველად მოხდა პლაზმაფერეზის გამოყენება COVID-19-ით პაციენტის სამკურნალოდ და ამ შემთხვევამ გვიჩვენა, რომ პლაზმაფერეზი შესაძლოა სასარგებლო გამოდგეს COVID-19-ით მძიმე ავადმყოფების სამკურნალოდ (ყოველ შემთხვევაში ცალკეულ ავადმყოფებთან), მაგრამ მისი გამოყენება აუცილებლად უნდა მოხდეს ჩვენებების და უკუჩვენებების მკაცრად გათვალისწინებით", — ნათქვამია ინფექციური საავადმყოფოს განცხადებაში.