აშშ-ს სახელმწიფო მდივანი, მაიკ პომპეო ამბობს, რომ აშშ-მ, რომელიც ჯანმოს ყველაზე დიდი დონორი იყო, შესაძლოა, საერთოდ აღარ აღადგინოს ორგანიზაციის დაფინანსება. გასულ კვირას პრეზიდენტმა დონალდ ტრამპმა განაცხადა, რომ ის ჯანდაცვის მსოფლიო ორგანიზაციას დაფინანსებას უწყვეტდა და ამასთან, ისინი "პანდემიის საფრთხის არასწორ მართვაში" დაადანაშაულა.

მაიკ პომპეომ Fox News-ს უთხრა, რომ აშშ კარგად დააკვირდება ჯანდაცვის მსოფლიო ორგანიზაციას და დაამატა ისიც, რომ მათ სჭირდებათ დაინახონ "ორგანიზაციის ქმედებების სტრუქტურული გამოსწორება".

კითხვაზე, გამორიცხავს თუ არა ის ორგანიზაციის ხელმძღვანელობის ცვლილებას, პომპეო პასუხობს: "უფრო მეტიც, ეს შეიძლება გახდეს შემთხვევა, როდესაც შტატების გადასახადის გადამხდელთა დოლარები აღარ წავიდეს ჯანდაცვის მსოფლიო ორგანიზაციაში. ჩვენ უფრო თამამი ცვლილებები გვჭირდება".

სამშაბათს, 14 აპრილს, დონალდ ტრამპმა განაცხადა, რომ აშშ ჯანდაცვის მსოფლიო ორგანიზაციის დაფინანსებას დროებით წყვეტს.

ტრამპის თქმით, დაფინანსება 60-90 დღის განმავლობაში შეწყდება, ამ დროის განმავლობაში ისინი კორონავირუსის მიმართ ჯანდაცვის მსოფლიო ორგანიზაციის პასუხს გააანალიზებენ და შეაფასებენ. ტრამპმა WHO-ს კრიზისის "უკიდურესად ცუდად მართვაში და საფრთხის დამალვაში" დასდო ბრალი.