იაპონია სექსმუშაკებს, რომელთაც სოციალური დისტანცირების პირობებში შემოსავალი თითქმის შეუწყდათ, დახმარებას სთავაზობს, თუმცა უფლებამდაცველი ორგანიზაციები ამბობენ, რომ რეგულაციების გამო ამ სტიგმატიზებულ ინდუსტრიაში მყოფ ქალებს დახმარების მიღების შემთხვევაში ანონიმურობის შენარჩუნება გაუჭირდებათ.

იაპონიის მთავრობამ ეკონომიკის სტიმულირებისათვის 108 ტრილიონი იაპონური იენი გამოყო, რაც დაახლოებით 1 ტრილიონი დოლარია. თავდაპირველად ფინანსური პაკეტის მიმღებთა სიაში სექსმუშაკები არ იყვნენ, რამაც ოპოზიციისა და აქტივისტების გაღიზიანება გამოიწვია. სოციალურ მედიაში ჰეშგეტი #ღამისსამუშაოცსამუშაოა ტრენდული გახდა.

"არ ვიცი, როდის დაიწყო ამ ქვეყანამ ადამიანთა სიცოცხლის დახარისხება", — ნათქვამი იყო ერთ ტვიტში, — "ასევე მიატოვებდით მარტოხელა დედებს, რომლებიც ღამის ცვლაში მუშაობენ? შეწყვიტეთ სტერეოტიპებით აზროვნება, შეწყვიტეთ მიზოგინია".

იაპონიაში პროსტიტუცია არალეგალურია, თუმცა სექს-ინდუსტრიის გარკვეული სეგმენტები დაშვებულია.

მთავრობამ უკან დაიხია და გადაწყვიტა, რომ ეკონომიკური მხარდაჭერის პროექტში სექსმუშაკებიც გაეთვალისწინებინა.

მათ დახმარების აღება ნაღდი ფულითაც შეუძლიათ, როგორც ადამიანებს, რომელთაც შემოსავალი პანდემიის დროს დაკარგეს, თუმცა პროგრამას ჯერაც აქვს ხარვეზები. ჯერჯერობით გაურკვეველია, თანხის მიღებას მხოლოდ ის მუშაკები შეძლებენ, რომლებიც მთლიანად უმუშევრად დარჩნენ (მაგალითად, კლიენტებთან დამაკავშირებელი აგენტები დაკარგეს) თუ ის ქალებიც, რომელთაც შემოსავალი მნიშვნელოვნად შეუმცირდათ.