არ ვიყავი მიწვეული კორპორაციულ წვეულებაზე, ამით მე არაფერი დამაკლდება, — ამის შესახებ მოსამართლე ვლადიმერ ხუჭუამ განაცხადა. ინფორმაციას ინტერპრესნიუსი ავრცელებს.

შეგახსენებთ, რომ ვლადიმერ ხუჭუა თეთრიწყაროს რაიონული სასამართლოს მოსამართლეა, რომელმაც 2024 წლის 26 ოქტომბრის საპარლამენტო არჩევნებზე ხმის ფარულობის დარღვევა დაადასტურა და ორი ოლქის შედეგები გააბათილა.

"ვადასტურებ, რომ არ ვიყავი მიწვეული კორპორაციულ წვეულებაზე. არავის ჰქონია ჩემთან აღნიშნულის თაობაზე კომუნიკაცია. ეს არ არის პირველი შემთხვევა, როდესაც მსგავს შეხვედრებზე არ ვარ მიწვეული. მინდა, კიდევ ერთხელ განვაცხადო, რომ ამით მე არაფერი დამაკლდება. სხვა დეტალებსა და ნიუანსებზე არ მსურს საუბარი, ჩემთვის მთავარია გავუფრთხილდე სასამართლოს პრესტიჟს, ქართველი მოსამართლის ღირსებას და ასევე პრესტიჟს. მე არ გამკვირვებია ზოგი მოსამართლის მხრიდან ჩემი მისამართით არაკორექტული ქმედებები, წინა წლებშიც იყო მსგავსი რამ. მე არაფერი მაკლდება, არ ვსაუბრობ სხვა რაიმე დეტალებზე მხოლოდ იმის გამო, რომ ქართველი მოსამართლის ღირსებას და პრესტიჟს გავუფრთხილდე", — განაცხადა თეთრიწყაროს რაიონულმა სასამართლოს მოსამართლემ ვლადიმერ ხუჭუამ.

დღეს რესტორან "ბაბილოში" მოსამართლეები სადღესასწაულო ვახშამზე მწვავე პროტესტის ფონზე შეიკრიბნენ. საპროტესტო აქციებზე დაკავებულთა ოჯახის წევრებს, ახლობლებსა და მოქალაქეებს რესტორნის შესასვლელთან საპროტესტო ბანერი ჰქონდათ გაშლილი. მოსამართლეთა ნაწილს რესტორანში მოსახვედრად ამ ბანერში გაძრომა უწევდა, ნაწილს — გადაბიჯება, ნაწილმა კი გაძრომა არ ისურვა და უკან გაბრუნდა.