საქართველოს მეხუთე პრეზიდენტის, სალომე ზურაბიშვილის თქმით, საქართველოში მიმდინარე საპროტესტო აქციების პარალელურად დემონსტრანტების დაპატიმრება და წამება გრძელდება — ამის შესახებ იგი სოციალურ ქსელ X-ზე წერს.

"45-ე დღე- დემონსტრაციები დიდ ქალაქებში და რეპრესიები: დაპატიმრებები და წამება, "ტიტუშკები" და სამედიცინო დახმარების მიღების უფლების ჩამორთმევა. აუცილებელია მეტი ზეწოლა ჩვენი ევროპელი მეგობრების მხრიდან ახალი არჩევნების მოთხოვნით", — წერს ზურაბიშვილი.

ამასთან, იგი აღნიშნავს, რომ დაკავებული აქციის მონაწილეები პატიმრობაში რჩებიან ყოველგვარი სამართლებრივი და ფაქტობრივი საფუძვლის გარეშე, ხოლო მოსამართლეები ასრულებენ მხოლოდ მმართველი პარტიის ბრძანებებს.

"საპროტესტო აქციების მონაწილე ყველა დაკავებული სასამართლოს ბოლო დღეების გადაწყვეტილებით ყოველგვარი სამართლებრივი და ფაქტობრივი საფუძვლის გარეშე იმყოფება პატიმრობაში. მოსამართლეები მხოლოდ მმართველი პარტიის ბრძანებებს ასრულებენ!", — წერს იგი.

ამასთან, საქართველოს მეხუთე პრეზიდენტი ეხმაურება "ბათუმელების" და "ნეტგაზეთის" დამფუძნებლის, მზია ამაღლობელის დაკავებას.

"ტერორი საქართველოში. ჟურნალისტების დაპატიმრებები გრძელდება. ერთ ღამეში ორჯერ!", — წერს ზურაბიშვილი.