ევროკავშირის საგარეო საქმეთა სამსახურის განცხადებით, რუსეთი და ჩინეთი ინტერნეტში კორონავირუსზე კონსპირაციულ თეორიებს ავრცელებენ. ამის შესახებ ინფორმაციას POLITICO ავრცელებს.

მათივე განცხადებით, დეზინფორმაციას საზოგადოებრივ ჯანდაცვასა და უსაფრთხოებაზე პირდაპირი გავლენის მოხდენა შეუძლია.

გამოცემის ცნობით, ევროკავშირის სტრატეგიული კომუნიკაციების სააგენტომ აღნიშნულთან დაკავშირებით ანგარიში მოამზადა, სადაც საუბარია, რომ რუსეთისა და ჩინეთის სახელმწიფოს მხარდაჭერით მოქმედი მედიასაშუალებები ევროკავშირსა და მის სამეზობლოში ცრუ ინფორმაციას ავრცელებენ.

"რუსული ოფიციალური წყაროები და სახელმწიფოს მიერ კონტროლირებადი მედია ჯანმრთელობის შესახებ დეზინფორმაციას გასავრცელებლად კოორდინირებულად მოქმედებენ", — ნათქვამია ანგარიშში.

მათივე თქმით, როგორც ევროკავშირში, ისე მის გარეთ დეზინფორმაცია განსაკუთრებით ისეთ მცირე მედიაბაზრებს აზიანებს, სადაც ტექნოლოგიური კომპანიები ამ კამპანიის საწინააღმდეგო ზომებს არ იღებენ.

რაც შეეხება ჩინეთის მიერ გავრცელებულ დეზინფორმაციას, სტრატკომის განმარტებით, ის კორონავირუსის პანდემიის ფონზე ჩინეთის მისამართით წამოსულ ბრალდებების ფონზე, ქვეყნის იმიჯის გაუმჯობესებას ემსახურება.