მას შემდეგ, რაც ცნობილი გახდა, რომ მიხეილ სააკაშვილის საპრეზიდენტო ბიბლიოთეკაში ხანძარი იყო, Facebook-ზე გავრცელდა ვიდეო, სადაც კაცი ამბობს, რომ შენობის "დემონტაჟს" აპირებს. კადრებში ჩანს ცეცხლმოკიდებული ბიბლიოთეკაც.

თავდაპირველად ის მაყურებელს აღდგომას ულოცავს და აღნიშნავს, რომ "კორონავირუსის" ბუდე იპოვა და მისი "დემონტაჟი" სურს. ამის შემდეგ ის ამბობს, რომ ტელეფონს ჯიბეში შეინახავს და მაყურებელს მერე აჩვენებს რასაც გააკეთებს. რამდენიმე წამის განმავლობაში კადრი ბნელდება, თუმცა ისმის მტვრევის ხმა. სავარაუდოდ, ის შენობას გარკვეულ ნივთებს ესვრის. ხმაურის შემდეგ კადრში ცეცხლმოკიდებული ბიბლიოთეკა ჩნდება.

ვიდეოს ამ ხნის განმავლობაში თავად ეს ადამიანი იღებს. მას შემდეგ, რაც კადრში ცეცხლი ჩნდება, ის ტერიტორიას ტოვებს, თუმცა პოლიციას მიმართავს, რომ დაურეკოს:

"არაა პრობლემა, არსად არ გავრბივარ".

ის ამბობს იმასაც, რომ ქვეყანას ნიკოფსიისან დარუბანდამდე გააერთიანებს.

"სადამდე იბლატავებენ ეს ბო*იშვილები, გაყიდეს მთელი ქვეყანა", — ამბობს ის.

ინფორმაცია იმის შესახებ, რომ მიხელ სააკაშვილის საპრეზიდენტო ბიბლიოთეკაში ხანძარი გაჩნდა, დღეს გავრცელდა. დამწვარია 15 კვადრატამდე ფართი, სადაც საოფისე ინვენტარი იყო. როგორც On.ge-ს შინაგან საქმეთა სამინისტროში განუცხადეს, მომხდარზე გამოძიება საქართველოს სისხლის სამართლის კოდექსის 187-ე მუხლის მე-2 ნაწილის "ა" ქვეპუნქტით დაიწყო, რაც ცეცხლის წაკიდებით ნივთის დაზიანებას ან განადგურებას გულისხმობს. აღნიშნული მუხლი სასჯელის სახით 3-დან 5 წლამდე თავისუფლების აღკვეთას ითვალისწინებს.