რუსეთის ფილმსაცავში დაცული ქართული კინომემკვიდრეობა სამშობლოს უბრუნდება.

პირველ ეტაპზე "გოსფილმოფონდიდან" ქართულ მხარეს ოთხი ქართული ფილმის ასლი გადაეცემა. ესენია: ლეო ესაკიას "ჰოლტზე" და "ამერიკანკა", ნუცა ღოღობერიძის "ბუბა" და მიხეილ ჭიაურელის "უკანასკნელ საათს".

2014 წლის 30 სექტემბერს საქართველოს კულტურისა და ძეგლთა დაცვის მინისტრმა მიხეილ გიორგაძემ და რუსეთის ფედერაციის სახელმწიფო კინოფონდის გენერალურმა დირექტორმა ნიკალაი ბოროდაჩევმა ხელი მოაწერეს ისტორიული მნიშვნელობის დოკუმენტს, რომლის თანახმადაც რუსეთის ფედერაციის სახელმწიფო კინოფონდი საქართველოს 1921 წლიდან 1999 წლამდე გადაღებულ და ფონდის არქივში დაცულ ქართულ ფილმებს დაუბრუნებს.

"გოსფილმოფონდში" დაცული ქართული კინოარქივის სრულად საქართველოში დაბრუნებას 7 წელი დასჭირდება. საუბარი ამ ეტაპისათვის 706 ქართულ ფილმზეა, თუმცა, შესაძლოა, ეს რიცხვი კიდევ გაიზარდოს.

ფილმების ქართული მხარისთვის საზეიმო გადაცემის ცერემონია 17 ნოემბერს გაიმართება. ღონისძიებას ორგანიზებას საქართველოს კულტურისა და ძეგლთა დაცვის სამინისტროსთან ერთად ეროვნული კინოცენტრიც გაუწევს.