სწრაფი კვება სულ უფრო და უფრო პოპულარული ხდება მთელ მსოფლიოში. ამის მიზეზი ადამიანების გადატვირთული გრაფიკია. სახლში სადილის მომზადება, სუფრის გაწყობა და ალაგება, შემდეგ კი ჭურჭლის რეცხვა დიდ ძალისხმევას მოითხოვს, რისთვისაც ყველას არ აქვს დრო. ბოლო მონაცემებით, ყოველდღიურად 2.5 მილიარდი ადამიანი იკვებება ქუჩის სწრაფი კვების ობიექტებში, სადაც საკვებიცა და სასმელიც უკვე მზად არის, რაც მყიდველებს კომფორტს უქმნის.

სწრაფი კვების ობიექტების მენიუ საკმაოდ მრავალფეროვანია. ხანდახან ქუჩაში ისეთი კერძების გასინჯვაც შეიძლება, რომელთაც სხვაგან ვერ შეხვდებით. მაგალითად, უამრავი მოგზაური თუ ტურისტი აზიურ ქვეყნებში სტუმრობისას დიდი სიამოვნებით მიირთმევს დახლებზე გამოფენილ სულ რამდენიმე წუთში მომზადებულ კერძებსა თუ ტკბილეულს.

იაპონია

ეგზოტიკური საკვების მოყვარულებისათვის იაპონური ქუჩის სწრაფი კვება ნამდვილი თავგადასავალია. როგორც ვიდეოში ჩანს, იაპონური სამზარეულო საკმაოდ მრავალფეროვანია (ცომეული, ბოსტნეული, ხილი და ზღვის პროდუქტები). უნიკალური ინგრედიენტები, რომლებსაც მთელ მსოფლიოში ჰყავს თაყვანისმცემლები, ქუჩის საკვებშიც ხშირად გვხვდება. სხვადასხვა ქალაქში ყოველწლიურად უამრავი ფესტივალი და გამოფენა იმართება, სადაც სტუმრები იაპონიის ყველა კუთხისთვის დამახასიათებელ საკვებს ეცნობიან.

კორეა

კორეული სამზარეულო ასევე საკმაოდ პოპულარულია მსოფლიოს მასშტაბით, თუმცა ამბობენ, რომ ყველაზე გემრიელი საჭმელი ლოკალურად, სეულში მზადდება. კორეული საჭმელების სურნელი თითქმის ყველა თავშეყრის ადგილზე შეგიძლიათ შეიგრძნოთ. ბრინჯისგან დამზადებული მაკარონი, ზღვის ვარსკვლავი, რვაფეხები და შებრაწული კალიები - ეს იმ საჭმელების მცირე ჩამონათვალია, რომლებსაც ქუჩაში წააწყდებით.

ჩინეთი

ჩინურ ფასტფუდს ამჟამად უამრავი მომხმარებელი ჰყავს. საინტერესოა, რომ უმეტესად მზარეულისა და გამყიდველის ფუნქციებს ერთი ადამიანი ითავსებს. სისწრაფე, პროფესიონალიზმი, გემოების მოულოდნელი შეხამება - ეს ჩინური სამზარეულოს წარმატების მთავარი გასაღებია.

აშშ

ამერიკის სწრაფი კვების ბოლო ტრენდი "საჭმელი ბორბალზე" ანუ მოძრავი რესტორანია. თავის მხრივ, ამერიკული ფასტფუდი სხვადასხვა ეთნიკური წარმომავლობის კერძებს აერთიანებს: აქ ნაჩოსაც ნახავთ, პიცასაც და ბურიტოებსაც. ამ ინდუსტრიას წელიწადში $870 მილიონის მოგება მოაქვს და ყოველწლიურად 7.9%-ით იზრდება.

საქართველო

ქართველები თუ რამით ვამაყობთ, ეს ჩვენი უგემრიელესი სამზარეულო და მრავალფეროვანი კერძებია.

ქუჩის სწრაფი კვება ჩვენთანაც უამრავი ადამიანის ყოველდღიური რეჟიმის ნაწილია. თანაც, ქუჩაში საკვები ბევრად იაფია, ვიდრე კაფეში ან რესტორანში. ქართული ფასტფუდი უმეტესად ცომიანია და იშვიათად გაიცემა რაიმე ხელსაწყოსთან ერთად (ჩანგალი და მუყაოს ყუთები ჩვენთან ქუჩაში ჭამის კულტურის ნაწილი არაა).

ჩვენთან ძალიან პოპულარულია იმერული და ფენოვანი ხაჭაპურები, ლობიანი, კარტოფილის, ხორცისა თუ ბოსტნეულის ღვეზელები და ქადები. არაქართული საკვებიდან თავის დამკვიდრება ყველაზე უკეთ შაურმამ შეძლო.