ექიმი ანესთეზიოლოგი, რეანიმატოლოგი არჩილ მარშანიას განცხადებით, სამედიცინო განათლება არაა იმის მისახვედრად საჭირო, რომ ქრისტეს არავინ არ ებრძვის. ამ თემაზე არჩილ მარშანიამ TV პირველის ეთერში ისაუბრა.

"ძალიან არასწორად ხდება ინტერპრეტაცია მეორე მხრიდან, ვინც არიან ღრმად მორწმუნეები, რომ თითქოს ვინმე ეკლესიას ან რწმენას ებრძვის და ა.შ. არანაირი პრობლემა ევქარისტიაში, თავად რწმენაში, ქრისტეში არაა. რწმენით ისევე როგორც, მობილური კავშირგაბმულობით, ვირუსი არ გადადის, პრობლემაა ხალხმრავლობა, საერთო გამოყენების ნივთები", — თქვა არჩილ მარშანიამ.

ექიმის თქმით, სამწუხაროა, რომ ორი თვის განმავლობაში ერთი და იგივე საკითხებზე უწევთ საუბარი. მისი თქმით, კარგია, რომ მორწმუნეების უმეტესობას სწორად ესმის ქრისტეს არსი და ღმერთს "გამოცდას არ უტარებენ" გადაედებათ თუ არა ვირუსი.

დღეს, 14 აპრილს ბოჭორიშვილის კლინიკამ განაცხადა, რომ კოორნავირუსი სასულიერო პირს დაუდასტურდა. მედიაში ცოტა ხნის წინ გავრცელდა კადრები, სადაც ჩანს, რომ ტაძარი დახურულია და სადეზინფექციო სამუშაოები უტარდება.

ბოლო მონაცემებით, საქართველოში კორონავირუსი 296 ადამიანს დაუდასტურდა. მათგან გამოჯანმრთელებულია 69, ხოლო გარდაცვლილია 3 ადამიანი. კარანტინის რეჟიმში 4 856 ადამიანი იმყოფება, სტაციონარში მეთვალყურეობის ქვეშ კი 458.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: