დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

პრემიერ-მინისტრი გიორგი გახარია მოუწოდებს მოქალაქეებს, რომ პირველივე სიმპტომების გაჩენისთანავე ჯერ 112-ში დარეკონ და საავადმყოფოში თავად არ წავიდნენ.

"სისტემა გაუძლებს, თუ თითოეული მოქალაქე პასუხისმგებლიანად მიუდგება მის ყოველდღიურ ცხოვრებას. როცა პირველი სიმპტომები გვაქვს, საავადმყოფოში არ უნდა გავიქცეთ. უნდა ავიღოთ ტელეფონი და დავრეკოთ 112-ზე", — განაცხადა მან.

გახარიას თქმით, 112-ში აეწყო ახალი ხაზი, რომელიც ჯანდაცვის სამინისტროსთან, ოჯახისა და სოფლის ექიმებთან ერთად იმუშავებს და მოქალაქეების ეფექტურ მომსახურებას უზრუნველყოფს. მისი თქმით, ქსელი დატვირთვას გაუძლებს და 112 სრულად არის მობილიზებული.

"თითოეულ ჩვენს მოქალაქეს როგორც კი რაიმე ელემენტარული სიმპტომი ექნება —სიცხის მატება, სუნთქვის გართულება — შეუძლია აიღოს ტელეფონი, აკრიფოს 112, საიდანაც მას პირდაპირ დააკავშირებენ მისი რეგიონის ოჯახის ან სოფლის ექიმთან. [...]

შემდგომ უკვე ჩეკლისტის შესაბამისად ტარდება კონსულტაცია, თუ საჭიროა მოქალაქის გადაყვანა სტაციონარზე, მაშინ ის გადაყავთ ცხელების რეგიონალურ ცენტრში, სადაც მას აქცევენ ყურადღებას, უტარდება ტესტები და ამის შემდეგ იქნება მიღებული გადაწყვეტილება, რომელ სტაციონარში გადაიყვანენ", — განმარტა გახარიამ ჟურნალისტებთან.

მისივე თქმით, ყველას უნდა ესმოდეს, რომ ეს არის კორონავირუსთან ბრძოლის პირველი ხაზი.

საქართველოში კორონავირუსით ინფიცირებულთა რიცხვი 214-მდე გაიზარდა. გარდაცვლილია 3, გამოჯანმრთელებულია 50 ადამიანი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: