Homecoming 2018 წლის ერთ-ერთი ყველაზე გახმაურებული სერიალია, რომლის პირველ სეზონშიც მთავარ როლს ჯულია რობერტსი ასრულებს. სერიალმა მაყურებლების დადებით შეფასებასთან ერთად ოქროს გლობუსის სამი ნომინაციაც დაიმსახურა.

Amazon Prime Video კი წელს სერიალის მეორე სეზონს შემოგვთავაზებს, რომელიც სერიალს ერთგვარ ანთოლოგიად გადააქცევს: მეორე სეზონში განვითარებულ მოვლენებს პირველი სეზონის სიუჟეტთან გარკვეული კავშირი ექნება, თუმცა ამჯერად განსხვავებულ ისტორიასა და ახალ პერსონაჟებზე მოგვითხრობს.

ახალი სეზონის 30-წამიანი თიზერი რამდენიმე საათის წინ გავრცელდა:

აღსანიშნავია, რომ მეორე სეზონში ჯულია რობერტსის ნაცვლად მთავარ როლში ჟანელ მონეს ვიხილავთ, რომელიც გარდა იმისა, რომ ცნობილი მომღერალია, აქამდე უკვე ისეთ ფილმებში აქვს ნათამაშები, როგორებიცაა Moonlight და Hidden Figures.

Homecoming-ის პირველი სეზონი ამავე სახელწოდების ცნობილი პოდკასტების სერიის მიხედვით გადაიღეს, სადაც ჯარისკაცები ომში მიღებულ გამოცდილებასა და ტრავმებზე საუბრობდნენ. ჯერჯერობით ზუსტად ცნობილი არ არის, თუ რის შესახებ იქნება მეორე სეზონი, თუმცა ახლახანს გავრცელებული თიზერით თუ ვიმსჯელებთ, ის კიდევ უფრო მისტიკური და დაძაბული იქნება.

ახალი სეზონის პრემიერა 22 მაისს შედგება.