აბბა ალავერდელი მიტროპოლიტი, მეუფე დავითი ამბობს, რომ მოქალაქეებმა წესები უნდა დაიცვან, თუმცა რწმენას არ უნდა უღალატონ. მიტროპოლიტის ამ კომენტარს რუსთავი 2 ავრცელებს.

"ეს დღეები მუდმივად ლაპარაკია საფრთხე, ვირუსი, ყველაფერი ერთად აღებული, ბევრჯერ გვითქვამს და კიდევ ერთხელ, რა თქმა უნდა, წესი, როგორც მოქალაქეებისა ვალია და უნდა დავიცვათ, მაგრამ აღმატებული ზეცას მოქალაქეთა წესი უნდა დავიცვათ, არ უღალატოთ რწმენას", — თქვა მეუფე დავითმა.

სასულიერო პირები აღდგომის ლიტურგიასთან დაკავშირებით ამბობენ, რომ იმ კურთხევას შეასრულებენ, რასაც საპატრიარქო გასცემს. მეუფე ნიკოლოზმა დღეს მედიასთან საუბრისას თქვა, რომ სავარაუდოდ, ამ თემაზე გადაწვეტილებას დიდი ხუთშაბათის შემდეგ მიიღებენ.

დღეს, 7 აპრილს მართლმადიდებელი ეკლესია ხარების დღესასწაულს აღნიშნავს. პირველ აპრილს პატრიარქმა ილია მეორემ გაავრცელა მიმართა, რომლის თანახმადაც, ტაძრის კარის დახურვა შეუძლებელია და ღია იქნება მათთვის, ვინც ეკლესიაში მისვლას მოისურვებს, შესაბამისად ჩატარდება სააღდგომო ლიტურგიაც. ტაძრებში წირვა-ლოცვების ჩატარებისთვის კი სასულიერო პირებს სამი რეკომენდაცია სმს-თი გაუგზავნეს.

სამი რეკომენდაცია:

  • კომენდანტის საათის გათვალისწინებით, ხვალიდან ლოცვები დაიწყოს შუა დღის 16:00 საათზე, ხოლო ყოველ დღე ეკლესია დაიკეტოს საღამოს 8 საათისთვის;
  • აუცილებელია ტაძრის ეზოში 1,5მ-ის დაშორებით დროულად გაკეთდეს ნიშნულები;
  • ყოველდღიურად ხშირად უნდა გაიწმინდოს ხატები და სიწმინდეები (სპირტისა და ვარდის წყლით), ასევე, დამუშავდეს იატაკი და ეკლესიაში მუდმივი მეთვალყურეობისთვის გამოიყოს პასუხისმგებელი პირები.

სამთავრობო გუნდი ისევ აცხადებს, რომ საკარანტინო შეზღუდვები ეხება ყველას და სააღდგომო ლიტურგიაზე შეკრებაც საკომენდანტო საათის დარღვევა იქნება, თუმცა 3-ზე მეტი ადამიანის შეკრებისთვის ეკლესიაში არავინ დაუჯარიმებიათ.

მინისტრთა კაბინეტის წევრები უარს ამბობენ ეკლესიაში მისვლაზე და მოქალაქეებსაც სახლში დარჩენისკენ მოუწოდებენ.

ბოლო მონაცემებით, საქართველოში კორონავირუსით ინფიცირების 195 შემთხვევაა დადასტურებული.მათგან გამოჯანმრთელებულია 39, ხოლო გარდაცვლილია 2 ადამიანი. ჯანდაცვის სფეროს წარმომადგენლები ვირუსის გავრცელების პიკს აპრილის ბოლოს, სწორედ საეკლესიო დღესასწაულების დროს ელოდებიან.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: