აშშ-ს პრეზიდენტის, დონალდ ტრამპის ადმინისტრაციამ რუსული იმპერიული მოძრაობა გლობალურ ტერორისტულ ორგანიზაციად ცნო. ნაციონალური მოძრაობის სამი ლიდერი, სტანისლავ ორობიოვი, დენის გარიევი და ნიკოლაი ტრუშჩალოვი სანქციების სიაში შეიყვანეს.

როგორც ამერიკის ხმის რუსული სამსახური წერს, ეს პირველი შემთხვევაა, როდესაც სიაში მოხვდა ორგანიზაცია, რომელიც თეთრი რასის უპირატესობაზე საუბრობს. სანქციების სიაში შეყვანა გულისხმობს ორგანიზაციისთვის ნებისმიერი ფინანსური დახმარების აკრძალვას, ასევე, აშშ-ს ტერიტორიაზე შესვლასა და ფინანსური აქტივების გაყინვას.

სახელმწიფო დეპარტამენტის წარმომადგენლის, ნატან სეილზის განცხადებით, აღნიშნული ორგანიზაცია აშშ-სთვის საფრთხეს წარმოადგენს, რადგან 2015 წლის შემდეგ თეთრი რასის უპირატესობის მოტივით ტერორისტულმა აქტებმა იმატა.

სეილზის თქმით, რუსული იმპერიული მოძრაობა ნეონაცისტების სამხედრო მომზადებას უზრუნველყოფს, ასევე, ცდილობს ევროპელი და ამერიკელი თანამოაზრეები იმ ადამიანების წინააღმდეგ გააერთიანონ, ვისაც საკუთარ მტრებად თვლის. სახელმწიფო დეპარტამენტის წარმომადგენელი განმარტავს, რომ ორგანიზაციას ორი მოსამზადებელი ბანაკი აქვს სანქტ-პეტერბურგში, რომელშიც, სავარაუდოდ, ბრძოლასა და იარაღის გამოყენებას ასწავლიან.

კითხვაზე არის თუ არა რაიმე მინიშნება, რომ ორგანიზაცია რუსეთის ხელისუფლებასთან დაკავშირებული, სეილზი პასუხობს:

"შემიძლია მხოლოდ გითხრათ, რომ რუსეთს მოვუწოდებთ, დაიცვას ტერორიზმთან ბრძოლის ვალდებულებები. ჩვენ ეს ორგანიზაცია ტერორისტულ დაჯგუფებად ვაღიარეთ და მოვუწოდებთ ყველა პარტნიორს, მათ შორის რუსეთის ხელისუფლებას, ამ საფრთხეს ისევე სერიოზულად მიუდგნენ, როგორც ჩვენ".

მისივე თქმით, აშშ ფლობს ინფორმაციას, რომ რუსული იმპერიული მოძრაობის წევრები უკრაინაში სეპარატისტების მხარეს იბრძოდნენ.