მას შემდეგ, რაც მთელ მსოფლიოში კორონავირუსი გავრცელდა, იტალიიდან განსაკუთრებით სამწუხარო სტატისტიკის შესახებ ვიგებთ ყოველდღიურად, თუმცა არის გამორჩეულად სასიხარულო გამონაკლისებიც და მათ შორისაა იტალიკა გრონდონას შემთხვევაც, რომელმაც 102 წლის ასაკში დაამარცხა კორონავირუსის ინფექცია.

"ჩვენ მას ზედმეტსახელად უკვდავი შევარქვით", — განაცხადა ექიმმა, რომელიც მას გენუაში, სან მარტინოს კლინიკაში მკურნალობდა.

როგორც ექიმი ამბობს, "იტალიკა ამ პანდემიისას ყველა ასაკოვანი ადამიანის იმედია".

იტალიის ეროვნული ჯანდაცვის ინსტიტუტის ცნობით, ქვეყანაში კორონავირუსის ინფექციით დაღუპული ადამიანების საშუალო ასაკი 78 წელია.

იტალიკა გრონდონა კლინიკაში მარტის დასაწყისში მოათავსეს და 20 დღის განმავლობაში მკურნალობდნენ:

"მას კორონავირუსის სუსტი სიმპტომები ჰქონდა, მაგრამ მაინც ჩავუტარეთ ტესტი და ინფექცია დაუდასტურდა. მას შემდეგ მის გამოსაჯანმრთელებლად ჩვენ მხოლოდ მცირედი გავაკეთეთ, ძირითადად თავად შესძლო ამასთან გამკლავება", — განუცხადა ექიმმა CNN-ს.

როგორც იტალიკას მკურნალი ექიმები ამბობენ, ამ შემთხვევამ მათზე დიდი შთაბეჭდილება მოახდინა და მის შესწავლას უფრო საფუძვლიანად აპირებენ:

"მისი სისხლის ნიმუშები ავიღეთ, რადგან ის ჩვენთვის ნაცნობი პირველი პაციენტია, რომელმაც, შესაძლოა, ესპანური გრიპის სახელით ცნობილია პანდემიაც გადაიტანა, რადგან ის 1917 წელსაა დაბადებული".

ესპანური გრიპი 1918-1919 წლებში გავრცელდა და მსოფლიოში 50 მილიონზე მეტი ადამიანი იმსხვერპლა.

იტალიკა საავადმყოფოდან 26 მარტს გაეწერა და ახლა მასზე უკვე სახლში ზრუნავენ.

"არ ვიცი, რა არის მისი საიდუმლო, მაგრამ ვიცი, რომ ის თავისუფალი და დამოუკიდებელია ქალია", — აცხადებს იტალიკას ძმისშვილი, რენატო გრონდონა.