დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05
მთავრობის ცხელი ხაზი 144

საქართველოს პრემიერ-მინისტრის ინფორმაციით, მთავრობა კორონავირუსთან საბრძოლველად 351 მილიონ ლარს გამოყოფს. ამის შესახებ მან მთავრობის ადმინისტრაციაში გამართულ შეხვედრაზე ისაუბრა.

"ეს არის ის თანხა, რომელიც კრიზისულ ბიუჯეტში არის დღეს მდგომარეობით რეზერვირებული იმისთვის, რომ ჩვენ ვიბრძოლოთ ჩვენი თანამოქალაქეების ჯანმრთელობისთვის და ყველაფერი გავაკეთოთ, რათა ხელი შევუშალოთ ინფექციის როგორც მასშტაბის, ასევე, გეოგრაფიული გავრცელების სწრაფ ზრდას. ეს თანხა უნდა იყოს უაღრესად რაციონალურად გამოყენებული", — თქვა გახარიამ.

დღესვე, პრემიერ-მინისტრმა განაცხადა, რომ ეკონომიკის დახმარებისთვის 2 მილიარდი ლარი გამოიყოფა, ასევე, მარტში, აპრილსა და მაისში კომუნალური გადასახადები დაუფინანსდებათ იმ მოქალაქეებს, რომლებიც თვის განმავლობაში 200 კილოვატზე ნაკლებ ელექტროენერგიას და ასევე, 200 მ3-ზე ნაკლებ ბუნებრივ აირს მოიხმარენ.

ამ დროისთვის საქართველოში კორონავირუსის 115 დადასტურებული შემთხვევაა, აქედან 22 ადამიანი გამოჯანმრთელდა. კარანტინის რეჟიმში იმყოფება 5783 პირი, ხოლო სტაციონარში მეთვალყურეობის ქვეშ — 301.