People vs. O. J. Simpson-ის რეჟისორი კიდევ ერთ კრიმინალურ დრამას გადაიღებს. სერიალი, რომელიც ცნობილი რეპერების, 2Pac-ისა და The Notorious B.I.G.-ის დაპირისპირებასა და გაუხსნელ მკვლელობებს ეხება USA Network-ზე გავა.

სერიალის სიუჟეტი დეტექტივი გრეგ კადინგის გარშემო განვითარდება, რომელიც ამ ორი მკვლელობის საქმეს იძიებდა და გამოძიების შესახებ წიგნის ავტორიცაა. კადინგი სერიალის გადამღებ ჯგუფთან მუშაობს კონსულტანტად.

თუფაქ შაკური 1996 წელს ლას ვეგასში მოკლეს, ხოლო ბიგი, რომლის ნამდვილი სახელიც კრისტოფერ უოლასი იყო, 6 თვის შემდეგ ჩაცხრილეს ლოს ანჯელესში.

ორი რეპერის დაპირისპირება 1995 წელს დაიწყო. შაკური 1994 წლის ნოემბერში ერთ-ერთი ხმის ჩამწერი სტუდიის შესასვლელში დაჭრეს, რეპერი ამ ინციდენტში Notorious-სა და მის პროდიუსერს შონ ქომბსს, იგივე Puff Daddy-ს ადანაშაულებდა.