აშშ-ს პრეზიდენტ დონალდ ტრამპის განცხადებით, კორონავირუსთან საბრძოლველად მათ სხვადასხვა ქვეყნისგან, მათ შორის, რუსეთისგან და ჩინეთისგან, დახმარება მიიღეს.

"ჩინეთმა რაღაცები გამოგვიგზავნა, რაც შესანიშნავი იყო. რუსეთმა გამოგვიგზავნა ძალიან, ძალიან ბევრი სხვადასხვა ნივთი, ძალიან კარგი სამედიცინო აღჭურვილობა", — განაცხადა დონალდ ტრამპმა.

მან ასევე დაამატა, რომ სხვა ქვეყნებმაც გაუგზავნეს აღჭურვილობა, "რომლითაც სასიხარულოდ გაოცებული იყო".

30 მარტს დონალდ ტრამპმა და რუსეთის პრეზიდენტმა, ვლადიმერ პუტინმა ტელეფონით ისაუბრეს და COVID-19-თან ბრძოლის შესახებ ისაუბრეს.

აშშ-ში ინფიცირების 164 ათასი შემთხვევაა დაფიქსირებული, რაც მსოფლიოში ყველაზე მაღალი მაჩვენებელია. ვირუსის შედეგად 3 100 ადამიანი გარდაიცვალა. რუსეთი ოფიციალურად 1 800 შემთხვევას ადასტურებს. მათივე განცხადებით, კორონავირუსით 9 ადამიანი გარდაიცვალა.

რუსეთმა კორონავირუსთან საბრძოლველად დახმარება გაუგზავნა იტალიასაც, რომელიც ევროპაში ვირუსის შედეგად ყველაზე მეტადაა დაზარალებული. რუსეთის განცხადებით, მათ 600 სასუნთქი აპარატი, სამხედრო ვირუსოლოგები და ეპიდემიოლოგები, სადეზინფექციო და სტერილური საშუალებები გაგზავნეს. გამოცემა La Stampa-ს ერთ-ერთმა იტალიელმა ოფიციალურმა პირმა უთხრა, რომ გაგზავნილი აღჭურვილობის 80 პროცენტი გამოუსადეგარი იყო.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: