აუდიტორია 115 თსუ-ში დღეს, 11 მაისს, მიმდინარე არჩევნების შედეგად არჩეული აკადემიური საბჭოს სამომავლო საქმიანობას არალეგიტიმურად მიიჩნევს. მოძრაობის ერთ-ერთი წევრის, სანდრო ტაბატაძის განმარტებით, ვინაიდან აკადემიური საბჭოს არჩევნები არსებული კანონმდებლობის შესაბამისად ტარდება და მასში სტუდენტებიდან მხოლოდ საფაკულტეტო საბჭოში წარმოდგენილი სტუდენტური თვითმმართველობის წევრები იღებენ მონაწილეობას, არჩეული საბჭო დროებითი უნდა იყოს:

"მას არ უნდა ჰქონდეს ისეთი პოლიტიკური გადაწყვეტილებების მიღების უფლება, როგორიცაა რექტორის ან კანცლერის არჩევა, ან რაიმე მნიშვნელოვანი საკითხების გადაწყვეტის შესაძლებლობა მანამ, სანამ არჩევის წესი არ შეიცვლება და რიგით სტუდენტებს არ მოგვეცემა უფლება, რომ ჩვენი წარმომადგენელი გვყავდეს. მანამდე რამდენადაც გაფართოებული არ უნდა იყოს საფაკულტეტო საბჭო, მისი გადაწყვეტილება ლეგიტიმური და კანონიერი ვერ იქნება".

ტაბატაძემ ასევე განმარტა, რომ აუდიტორია 115-მა რამდენიმე დღის წინ სასამართლოში სარჩელიც შეიტანა, რომელიც იმ მუხლების არაკონსტიტუციურად ცნობას შეეხება, რომელთა თანახმადაც საფაკულტეტო საბჭოსა და აკადემიური საბჭოს არჩევის წესი, სტუდენტთა შორის თანასწორობის პრინციპს არღვევს.

მისი განმარტებით, სტუდენტური მოძრაობისა და ახალგაზრდა იურისტთა ასოციაციის მიერ ერთობლივად შედგენილი სარჩელი უმაღლესი განათლების შესახებ კანონის 20-ე, 27-ე და 45-ე მუხლებს შეეხება, რადგან სწორედ ისინი განსაზღვრავენ საფაკულტეტო საბჭოში წარმოდგენილ სტუდენტთა შემადგენლობასა და შემდგომში მათი მონაწილეობით აკადემიური საბჭოს არჩევასაც.

სტუდენტური თვითმმართველობის პრეზიდენტს, შალვა საბაურს კი მიაჩნია, რომ მუხლები, რომლებზეც აუდიტორია 115 აპელირებს კონსტიტუციას შეესაბამება, შესაბამისად, მას მიაჩნია, რომ საკონსტიტუციო სასამართლო განხილვაზეც კი არ მიიღებს ამ სარჩელს:

"მიმაჩნია, რომ ეს მკვდარი სარჩელია".

საბაურმა ასევე განაცხადა, რომ აღნიშნული დოკუმენტი სტუდენტურმა მოძრაობამ მხოლოდ და მხოლოდ აკადემიური საბჭოს არჩევნებში სტუდენტური თვითმმართველობის მონაწილეობის შეზღუდვის მიზნით შეიმუშავა.

რაც შეეხება საბაურის პოზიციას დღეს გამართულ არჩევნებთან დაკავშირებით, ის საარჩევნო უბანზე 13 საათზე მივიდა და თავისი არჩევანი იმ კანდიდატების მხარდასაჭერად გააკეთა, რომლებიც ჰგონია, რომ სხვისი გავლენის ქვეშ არ ექცევიან:

"ის [აკადემიური საბჭოს წევრი] საუნივერსიტეტო ლოგიკით უნდა იღებდეს გადაწყვეტილებას. მე მგონია, რომ რეგისტრირებულ კანდიდატთა სიაში მოიძებნება ისეთი კანდიდატები, რომლებიც ამ კრიტერიუმებს აკმაყოფილებენ და სწორედ ამ კრიტერიუმით გავაკეთებ არჩევანსაც".

თსუ-ში აკადემიური საბჭოს არჩევნების პირველი ეტაპი დღეს, 11 მაისს, 10 საათზე დაიწყო და 5 საათზე დასრულდა. არჩევნებში 33 კანდიდატი იღებს მონაწილეობას, რომელთაგან საბოლოოდ 14 უნდა აირჩიონ.