საქართველოს ექს-პრეზიდენტი და ოდესის ყოფილი გუბერნატორი მიხეილ სააკაშვილი აცხადებს, რომ უკრაინაში დარჩენას და პოლიტიკური მოღვაწეობის გაგრძელებას აპირებს:

"მე აქ დიდი საქმეში ვარ უკრაინაში ჩართული. ძალიან დიდ საქმეში. ჩვენ გვაქვს ძალიან დიდი მხარდაჭერა და მე ვაპირებ, აქ, გამარჯვებას."

სააკაშვილმა ისაუბრა ერთიან ნაციონალურ მოძრაობაში მიმდინარე პროცესებზეც. როგორც ექს-პრეზიდენტი ამბობს, მას არ უნდა საერთო ჰქონდეს პარტიის ზოგიერთ წევრთან:

"რაღაც ანეგდოტამდე მივიდა, რაღაცას აქვეყნებენ, რაც აღქმულია, რომ თითქოს ისინი გმობენ და ემიჯნებიან საკუთარ მომხრეებს და საკუთარ აქტივისტებს, იმ ხალხს, ვინც გადააკვდა თან საქართველოს საქმეს. დაიწყეს რაღაც უაზრო ლაპარაკი – სააკაშვილი კერპი უნდა იყო თუ არ უნდა იყოს. რა შუაშია სააკაშვილი? და რა შუაში ვარ ამ დებატებში მე? აქ საუბარი სხვა რაღაცაზეა. ივანიშვილმა გააყალბა არჩევნები და დედის რძესავით შევირგეთ ეს გაყალბება."

სააკაშვილის თქმით, მისი ვარაუდი გამართლდა. ენმ-მა მეორე საარჩევნო ტურში ვერც ერთი მანდატი აიღო და ამან დამატებითი დემორალიზება გამოიწვია:

"ამის შემდეგ კიდევ აგრძელებენ უაზრო ლაპარაკს, ის ერთი–ორი ტიპაჟი. საუბარი დაიწყეს, რომ თითქოს არსებობს რაღაც რვაწლიანი ციკლი, ათწლიანი ციკლი და ამათ უნდა დაველოდოთ თურმე კიდევ რამდენიმე წელში, როგორ გააყალბებს ივანიშვილი არჩევნებს."

ოდესის ყოფილი გუბერნატორი მიიჩნევს, რომ რეალური პრობლემების ნაცვლად ენმ სააკაშვილსა და საკუთარ ამომრჩეველს უპირისპირდება:

"თურმე პრობლემა არის სააკაშვილის, იმის, ამის. მათ პრობლემა სააკაშვილთან კი არ აქვთ, მათ პრობლემა აქვთ საკუთარ ხალხთან და პირველ რიგში ჩვენს მრავალრიცხოვან მხარდამჭერებთან, 600 ათას ჩვენს ამომრჩეველთან. იმ ხალხთან, ვინც არ უსმენს ჩვენს აქტივისტებს, ვინც დაუშვა ამდენი შეცდომა, ვინც პრაქტიკულად გამოგვიწერა დამარცხებები, არა მხოლოდ წარსულში, არამედ წინასწარ აქვთ გამოცხადებული დამარცხება მომავალში, ამ ახირებულ ერთ-ორ პერსონაჟთან, მათ შორის პარტიის ხელმძღვანელობის შიგნით, ხალხმა მინდა იცოდეს, მე არაფერი საერთო არ მინდა მქონდეს. ძალიან ნათელია, მე დავეხმარები ჩვენს ხალხს, ჩვენს აქტივისტებს, ჩვენ ვიბრძოლებთ და ჩვენ აუცილებლად გავიმარჯვებთ საქართველოში."