საქართველოს საგანგებო მდგომარეობა და გარდაცვლილთა ზრდა იტალიაში

დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

21 მარტის მდგომარეობით მსოფლიოში:

დადასტურებული შემთხვევა მსოფლიოში — 303 180;
გარდაცვლილი — 12 950;
გამოჯანმრთელებული — 91 676.

საქართველოში:

კორონავირუსის დადასტურებული შემთხვევა — 49;
კარანტინის რეჟიმში — 1 966;
სტაციონარში მეთვალყურეობის ქვეშ — 259;
გამოჯანმრთელებული — 1.

დღის ფაქტი

ჩვენს დნმ-ში ჩასახლებული ვირუსები — საიდან მოვიდნენ ისინი?

ვირუსების წარმოშობის ისტორია სამეცნიერო საზოგადოებაში დავის საგანია. იმიტომ, რომ განსხვავებით, მაგალითად, ცხოველური წარმოშობის ძიებისგან, ვირუსები თავის არსებობის მანძილზე ადვილად შესამჩნევ (პალეონტოლოგიურ) კვალს არ ტოვებენ.

ვირუსული ინფექციის კვალი ჩვენს დნმ-ში შეგვიძლია ვიპოვოთ. ჩვენივე გენომის კვლევით შეგვიძლია ვირუსების ევოლუციას დავაკვირდეთ და ვუპასუხოთ ერთ-ერთ მნიშვნელოვან შეკითხვას, რომელიც ხშირად მწვავე დისკუსიის საგანი: ცოცხალი ორგანიზმია თუ არა ვირუსი?

დეტალურად ვირუსების წარმოშობის შესახებ შეგიძლიათ გაეცნოთ სტატიას.

დღის მთავარი ჰედლაინი საქართველოში

საქართველოში საგანგებო მდგომარეობა გამოცხადდა

პრემიერ-მინისტრ გიორგი გახარიას წარდგინებით საქართველოს პრეზიდენტმა საგანგებო მდგომარეობა გამოაცხადა. რაც შემდეგ საქართველოს პარლამენტმა დაამტკიცა.

საგანგებო მდგომარეობა საქართველოს მთელ ტერიტორიაზე 21 აპრილამდე გასტანს. რიგ უფლებებთან ერთად, იზღუდება შეკრებისა და მანიფესტაციის უფლება. სიტყვა "შეკრებამ" ერთგვარი ბუნდოვანება გააჩინა.

ბრიფინგზე გამოსვლის დროს გიორგი გახარიამ აღნიშნა, რომ შეიზღუდება ათზე მეტი ადამიანის შეკრება, მათ შორის ეს ეკლესიასაც შეეხებოდა. პრეზიდენტის დეკრეტის დამტკიცების შემდეგ, სადაც შეკრებილთა რაოდენობაზე საუბარი არაა, პარლამენტის თავმჯდომარე არჩილ თალაკვაძემ განაცხადა, რომ დოკუმენტი "რწმენისა და აღმსარებლობის თავისუფლებას" არ ეხება. ამავე დროს, ვიცე-პრემიერმა მაია ცქიტიშვილმა ტელევიზიით კიდევ ერთხელ გაიმეორა, რომ შეზღუდვა ეკლესიაზეც გავრცელდებოდა.

სამართლებრივ ნიუანსების განხილვის პარალელურად, საპატრიარქოს პრესსპიკერმა ანდრია ჯაღმაიძემ თქვა, რომ პრემიერ საპატრიარქოში იყო მისული და აუხსნა, რომ შეკრებაზე შეზღუდვა ბუკვალურად არ გაეგოთ. საკვირაო წირვა ეკლესიებში მაინც ჩატარდება.

რა უფლებები დაემატა მთავრობას საგანგებო მდგომარეობის დროს

თუ პოლიტიკური და სამართლებრივი გარჩევები ნაკლებად გაღელვებთ, შეგიძლიათ წაიკითხოთ ჩვენი სტატია იმაზე, თუ რამდენად შეიცვლება თქვენი ცხოვრება საგანგებო მდგომარეობის გამოცხადების შემდეგ.

დღის მთავარი ჰედლაინი მსოფლიო მედიაში:

იტალიაში გარდაცვალების რეკორდული მაჩვენებელი ისევ დაფიქსირდა

სამწუხაროდ იტალიაში კორონავირუსით გარდაცვალების მაჩვენებელი კვლავ მზარდია. ბოლო ერთ დღეში ვირუსით 793 ადამიანი გარდაიცვალა. კიდევ უფრო მოიმატა COVID-19-ის დადასტურებულმა შემთხვევებმა და 53 578 შეადგინა.

სხვა მნიშვნელოვანი სიახლეები:

ისრაელში, ფინეთსა და ბოსნიაში კორონავირუსით გარდაცვალების პირველი შემთხვევა დაფიქსირდა;
რუსეთში ამბობენ, რომ კორონავირუსის 306 შემთხვევა აქვთ;
ქანთრი მომღერალი კენი როჯერსი 81 წლის ასაკში გარდაიცვალა;
ჩინეთის ხელისუფლებამ ოფიციალურად მოხსნა ბრალი ექიმს, რომელმაც კორონავირუსის შესახებ განგაში პირველმა ატეხა;
კოლუმბიამ ჩაკეტა საზღვარი და საყოველთაო კარანტინი გამოაცხადა;
საუდის არაბეთი მექასა და მედინას ორ მთავარ მეჩეთში ლოცვებს წყვეტს;
კარანტინის პირობებში საფრანგეთში კაცმა 42-კილომეტრიანი მარათონი თავის 7-მეტრიან აივანზე გაირბინა;
იუვენტუსის ფორვარდ პაულო დიბალასა და იტალიის ნაკრების ყოფილ კაპიტანს პაოლო მალდინის კორონავირუსი აქვთ;

დღის ფოტო

სლოვაკეთის პრეზიდენტი ზუზანა ჩაპუტოვამ ქვეყნის მთავრობა დაამტკიცა. ღონისძიება პრეზიდენტის სასახლეში გაიმართა და კორონავირუსის პანდემიის გამო ყველას ნიღაბი და ხელთათმანები ეკეთა.

ამბავი, რომელმაც გაგვაღიმა

კორონავირუსის გამო ქვეყნებმა ერთმანეთთან მიმოსვლა შეწყვიტეს და საზღვრები ჩაკეტეს. ეპიდემიის პირობებშიც ადამიანებს არ ავიწყდებათ თანადგომისა და მხარდაჭერის გამოხატვა. ყველაზე კარგად კი ამას ჩეხეთ-პოლონეთის საზღვრაზე ეს წარწერა აღწერს: