დაავადებათა კონტროლის ცენტრის ცხელი ხაზი 116 001
ჯანდაცვის სამინისტროს ცხელი ხაზი 15 05

14 მარტის მდგომარეობით:

• 155 792 დადასტურებული შემთხვევა მსოფლიოში
• 5814 გარდაცვლილი
• 74 264 გამოჯანმრთელებული

საქართველოში:

• კორონავირუსის დადასტურებული შემთხვევა - 30
• კარანტინის რეჟიმში - 439
• სტაციონარში მეთვალყურეობის ქვეშ - 64

დღის ფაქტი:

ესპანეთში ერთ დღეში კორონავირუსის 1 500 ახალი შემთხვევა დაფიქსირდა, რის შედეგადაც ინფიცირებული ადამიანების რაოდენობა 6 000-ს მიუახლოვდა.

დღის მთავარი ჰედლაინი მსოფლიო მედიაში:

ლონდონში კორონავირუსი ახალდაბადებულს დაუდგინდა

ლონდონში ახალდაბადებულს კორონავირუსი დაუდასტურდა. ჩვილი დაავადებაზე დაბადებისთანავე შეამოწმეს. დედა მშობიარობამდე რამდენიმე დღით ადრე საავადმყოფოში პნევმონიის ნიშნებით გადაიყვანეს. ჯერჯერობით უცნობია, ბავშვს მუცელში გადაედო კორონავირუსი, თუ - მშობიარობის დროს.

დღის ფოტო: მილანის ცენტრალური სადგური

დღის დამაიმედებელი ამბავი

ჩინეთში ორი უზარმაზარი ქარხანა დღეში 250 000 ბოთლ სადეზინფექციო სითხეს აწარმოებს

ჩინეთი, რომელიც, შეიძლება ითქვას, კორონავირუსს გაუმკლავდა, მზადაა, დანარჩენ მსოფლიოს მხარი დაუჭიროს. ჩინელმა მილიარდერმა, ჯეკ მამ აშშ-ს 500 000 ტესტი და 1 მილიონი ნიღაბი აჩუქა, უხანელი ექიმები იტალიაში გაემგზავრნენ დასახმარებლად, ჩინეთის ორი მასშტაბური ქარხანა კი სადეზინფექციო სითხის წარმოებაზე გადაერთო.

დღეს ჩინეთში მხოლოდ 11 ახალი შემთხვევა დაფიქსირდა.

რა ხდება მსოფლიოში:

• იტალიაში 2795 ახალი შემთხვევა და 175 გარდაცვალება დაფიქსირდა
• დიდ ბრიტანეთში გარდაცვლილთა რიცხვი 24 საათში გაორმაგდა და ამჟამად 21 ადამიანია გარდაცვლილი
• აშშ-ის შემთხვევებმა 2400-ს გადააჭარბა
• აშშ კორონავირუსის გამო მოგზაურების შესვლას ირლანდიიდან და ბრიტანეთიდანაც ზღუდავს
• ამერიკის პრეზიდენტმა, დონალდ ტრამპმა კორონავირუსზე ტესტი გაიკეთა
• საყურადღებოა საფრანგეთის მდგომარეობაც, სადაც დღეში 800-ზე მეტი ახალი შემთხვევა დაფიქსირდა. ჯამში საფრანგეთში 4 499 შემთხვევაა (პარასკევს 3 661 შემთხვევა იყო დაფიქსირებული)
• რუსეთში ბოლო 24 საათში 14 ახალი ინფიცირებული დაფიქსირდა. საერთო ჯამში კი 59 შემთხვევაა დაფიქსირებული.

რა ხდება საქართველოში:

14 მარტი საქართველოსთვის არც ისე კარგი ამბით დაიწყო: კორონავირუსით ინფიცირების კიდევ 5 შემთხვევა დადასტურდა და ინფიცირებულების რაოდენობა 30-მდე გაიზარდა.

გარდა ამისა, მნიშვნელოვანია, რომ ახალი შემთხვევებიდან ერთ-ერთი ე.წ მესამეული ანუ შიდა გავრცელების შემთხვევაა, რაც იმას ნიშნავს, რომ საქართველოში დაინფიცირებულმა პირმა ქვეყნის შიგნით გადასდო ვირუსი სხვას.

ერთ-ერთი კითხვა, რომელიც ხშირად ისმის, სურსათის მარაგებს შეეხება. გვაქვს თუ არა საკმარისი რესურსები? მოიმატებს თუ არა ფასები?

• სუპერმარკეტების წარმომადგენლების თქმით, მარაგები აქვთ და ფასების ზრდას არ აპირებენ
• ცქიტიშვილი: შეიძლება აღმოვჩნდეთ ბევრი ზეთით, მაკარონით ხელში, რომლებიც არ გვჭირდება
• სურსათზე დეფიციტის შექმნის რისკი არ არსებობს, ორგანიზებულად შევიძინოთ — დავითაშვილი

დღის თემა იყო ასევე საპატრიარქოს დამოკიდებულება ვირუსის გავრცელებისადმი. თუ თავდაპირველად უსაფრთხოების ზომების მიღებაზე სამღვდელოების წარმომადგენლები კატეგორიულ უარს აცხადებდნენ, ამჟამად რიტორიკა შერბილებულია:

• სამების ტაძარს დეზინფექცია ჩაუტარდა
• ერთჯერად ჭურჭელს საპატრიარქო მხოლოდ ზიარების შემდგომ, სასმლის მიღებისას გამოიყენებს

თუმცა, საუბარი იყო ასევე უზმოზე ნაკურთხი წყლის სმაზე, ნაკურთხი წყლის სახლში და სამსახურში პკურებაზე და ყოველ კვირას, 12-ზე ერთად ლოცვაზე.

კარგი ამბავია ის, რომ ჩინეთი საქართველოს სამედიცინო აღჭურვილობასა და დიაგნოსტიკურ რეაგენტებს ჩუქნის.

ერთი ამბავი, რომელმაც დღეს გაგვაღიმა

აშშ-მ იტალიას მხარდაჭერა ცაზე მისი დროშის ფერების დახატვით გამოუცხადა

დღის რჩევა:

როგორ გავწმინდოთ სმარტფონი უსაფრთხოდ?

ხელების საგულდაგულოდ დაბანას აზრი არ აქვს, თუ სისტემატურად არ გავწმენდთ სმარტფონს, რომელსაც ასე ხშირად ვეხებით და რომლის ზედაპირზეც უამრავი მიკრობი ბინადრობს. ტექნიკის მწარმოებლები გვაფრთხილებენ, რომ უხეშ ქიმიურ საშუალებებს, ისევე, როგორც ხელის გელსა და სველ ხელსახოცებს ეკრანის დაზიანება შეუძლია. აი, როგორ უნდა გაწმინდოთ თქვენი ტელეფონი:

• გამოაერთეთ ტელეფონი ელექტროენერგიის წყაროდან და გათიშეთ;
• აიღეთ მიკრობოჭკოვანი ქსოვილი, დაასველეთ თბილი წყლით და საპნით და ფრთხილად გაწმინდეთ ტელეფონის ეკრანი;
• მოერიდეთ ნებისმიერ "ღია" ადგილს, იმ შემთხვევაშიც კი, თუ ტელეფონი წყალგამძლეა. გარკვეული დროის შემდეგ ეს ფუნქცია ძალას კარგავს ხოლმე;
• გაამშრალეთ ტელეფონი ახალი მიკრობოჭკოვანი ქსოვილით.

გახსოვდეთ, რომ საპონი და წყალი ყველაზე ეფექტური მეთოდია ვირუსის გავრცელების შესაჩერებლად.

ერთად თავმოყრილი რეკომენდაციები:

• ჯანდაცვის მსოფლიო ორგანიზაციის აუცილებელი რეკომენდაციები კორონავირუსისგან დასაცავად

• კორონავირუსის პრევენციისთვის საჭირო რჩევები მოგზაურებისთვის

• ჯანდაცვის სამინისტროს რეკომენდაციები ჟურნალისტებისთვის

• რეკომენდაციები თვითიზოლაციაში მყოფები პირებისთვის

• როგორ უნდა გაიკეთოთ, გამოიყენოთ და გადააგდოთ ნიღაბი

• როგორ დავიბანოთ ხელები სწორად კორონავირუსისგან დასაცავად

• როგორ ვიზრუნოთ ფსიქიკურ ჯანმრთელობაზე კორონავირუსის დროს