პრინცმა ჰარიმ დაადასტურა, რომ ამერიკელი მსახიობი მეგან მარკლი მისი შეყვარებულია. კენსიგტონის სასახლის გავრცელებულ განცხადებაში ჰარი მედიას გოგონას შევიწროვებისა და შეურაცხყოფისათვის აკრიტიკებს.

განცხადების თანახმად, წყვილის ურთიერთობა რამდენიმე თვეს ითვლიდა და მედიის დამოკიდებულება მეგანისადმი "არასწორი" იყო. როგორც განცხადებაში წერია, პრინცი ჰარი იშვიათად რეაგირებდა გამოგონილ ისტორიებზე, თუმცა გასულ კვირაში მისი მოთმინება ამოიწურა.

"ნაწილი ძალიან საჯარო იყო - smear ეროვნული გაზეთის პირველ გვერდზე; კომენტარების რასისტული ქვეტექსტი; და აშკარა სექსიზმი და რასიზმი სოციალური მედიის ტროლებსა და ვებ-სტატიების კომენტარებში. ნაწილი კი საზოგადოებისთვის უცნობი იყო - სამართლებრივი დავები ღამღამობით, რათა ცილისმწამებლური ამბები არ დაბეჭდილიყო გაზეთებში; დედამისი, რომელსაც საკუთარი სახლის შესასვლელ კართან მისვლისთვის ფოტოგრაფებთან ბრძოლა უწევდა; რეპორტიორებისა და ფოტოგრაფების მცდელობები, არალეგალურად შეეღწიათ მის სახლში და ზარი პოლიციასთან, რომელიც ამგვარ ქმედებას მოჰყვა; მისი ექს-ბოიფრენდისთვის შეთავაზებული ქრთამები; თითქმის ყველა მეგობრის, თანამშრომლისა და ოჯახის წევრის შეწუხება."

32 წლის პრინცს დიდი ხანია პრესასთან დაძაბული ურთიერთობა აქვს. 20 წლის ასაკში ის ლონდონის ერთ-ერთი კლუბის წინ პაპარაცისთან ჩხუბისას დააფიქსირეს. 2012 წელს მისი შიშველი ფოტოები გაზეთების პირველ გვერდებზეც დაიბეჭდა.

თუმცა პოზიტიურად შუქდებოდა მისი საქველმოქმედო საქმიანობა და სამხედრო სამსახური.

BBC-ს სამეფო კორესპონდენტის, ნიკოლას უიტჩელის თქმით, ბრიტანულმა გამოცემებმა შესაძლოა გაითვალისწინონ ჰარის თხოვნა, თუმცა უიტჩელი უცხოურ გამოცემებზე გავლენის მოხდენას გამორიცხავს, რადგან პრინცის ურთიერთობის გაშუქებას მოგება მოაქვს.

უიტჩელის თქმით, განცხადება აჩვენებს, თუ რამდენად უნდა პრინც ჰარის თავისი ურთიერთობის მოფრთხილება მას შემდეგ, რაც წინა შეყვარებულმაც მსგავსი ყურადღება დაიმსახურა მედიისგან.

განცხადების ცნობით, ჰარი შეყვარებულის უსაფრთხოებაზე ღელავს და "იმედგაცრუებულია, რომ მის დაცვას ვერ ახერხებს". შესაძლოა, ადამიანები თვლიდნენ, რომ მედიის ამხელა ყურადღება თამაშის წესების ნაწილია და ის საფასურია, რაც პრინცთან ურთიერთობისთვის უნდა გადაიხადო. თუმცა თვითონ პრინცი ჰარი ამ მოსაზრებას არ ეთანხმება. მისი თქმით, ეს თამაში არაა. ეს მისი ცხოვრებაა.