CNN-ის ცნობით, მულტინაციონალური კომპანია LVMH, რომელიც ფუფუნების საგნების მწარმოებელი ისეთი ცნობილი კომპანიების მფლობელია, როგორებიცაა Christian Dior, Louis Vuitton და Givenchy, ხელის სადეზინფექციო ხსნარების წარმოებას იწყებს, რათა საფრანგეთის მთავრობას კორონავირუსის ეპიდემიასთან ბრძოლაში დაეხმაროს.

საფრანგეთში ამჟამინდელი მონაცემებით კორონავირუსით ინფიცირების 4 ათასზე მეტი შემთხვევაა დაფიქსირებული, მათგან 120 კი ფატალურად დასრულდა, როგორც BBC წერს.

აღსანიშნავია, რომ კომპანია, რომელიც აქამდე ისეთი ცნობილი ბრენდებისთვის, როგორებიცაა Dior და Givenchy, ძვირად ღირებულ სუნამოებსა და კოსმეტიკის საშუალებებს ამზადებდა, სადეზინფექციო ხსნარებს სრულიად უსასყიდლოდ გადასცემს საფრანგეთის მთავრობას, რათა შემდგომ ის უფასოდ გავრცელდეს ქვეყანაში.

"LVMH თავისი სუნამოებისა და პარფიუმერიის ბრენდების ხაზებს სპეციალური ხსნარების დიდი რაოდენობით დასამზადებლად გამოიყენებს. საფრანგეთის ჯანდაცვის წარმომადგენლებთან მუდმივ კავშირში იქამდე გავაგრძელებთ ყველა საჭირო ღონისძიების გატარებას, სადამდეც ეს საჭირო იქნება", — აცხადებენ კომპანიაში.

საფრანგეთში ამჟამად თითქმის ყველა რესტორანი, კაფე და არააუცილებელი საჭიროების მქონე მაღაზიები ინფექციის გავრცელების პრევენციის მიზნით დახურულია.