ტყიბულში მეშახტეები მესამე დღეა კომპანიისა და სახელმწიფოს წარმომადგენლებთან ღია შეხვედრას ითხოვენ. დღეს, 16 მარტს მათ ძიძიგურის სახელობის შახტამდე საპროტესტო მსვლელობას გამართეს. მეშახტეები მოთხოვნების შეუსრულებლობის შემთხვევაში შიმშილობის დაწყებას აპირებენ. ამის შესახებ ინფორმაციას ტყიბულელი მეშახტეების სიანფორმაციო ჯგუფი ავრცელებს.

ტყიბულელ მეშახტეებს სამი მთავარი მოთხოვნა აქვთ:

1. სრულად აუნაზღაურდათ მეშახტეებს კომპანიის ბრალით გაცდენილი დღეები;
2. სახელმწიფო უწყებების ჩართულობით დაუყოვნებლივ მოეწყოს ღია და საჯარო შეხვედრა კომპანიის წარმომადგენლებთან;
3. მეშახტეებს გააცნონ შახტის მდგომარეობის ამსახველი აუდიტორული დასკვნა და ის ღონისძიებები, რომლებიც უსაფრთხოების გასაუმჯობესებლად იგეგმება.

"ეს არის ჩვენი ადმინისტრაციის პასუხი, ადამიანურადაც რომ გამოვიდნენ გარეთ, სოლიდარობა გამოგვიცხადონ და აგვიხსნან რა მდგომარეობაა შახტაში, ამაზეც არ იწუხებენ თავს. კიდევ ერთხელ დავინახეთ ჩვენ და საზოგადოებამ თუ რა ყურადღებას აქცევს დღეს ადმინისტრაცია და კომპანია მეშახტეებს", — თქვა აქციის ერთ-ერთმა მონაწილემ.

მეშახტეები ამბობენ, რომ აქციის შემდეგ მერიასთან გადაინაცვლებენ და იქ მოითხოვენ სახელმწიფო უწყებებმა ყურადღება გამოიჩინონ. მათი თქმით, უწყებებს მოთხოვნები წერილობით უკვე გაგზავნილი აქვთ.

ტყიბულელმა მეშახტეებმა სახელმწიფოს წარმმადგენლებს 14 მარტსაც მიმართეს. მათ საქართველოს პრემიერ-მინისტრს, ჯანდაცვის მინისტრსა და ეკონომიკის მინისტრს მოუწოდეს, დაუყოვნებლივ შედგეს მეშახტეების ღია შეხვედრა კომპანიასთან, სახელმწიფოს მონაწილეობით.

ტყიბულელი მეშახტეები კიდევ ერთხელ 13 მარტს გაიფიცნენ. გაფიცვის მთავარი მოთხოვნა თებერვალში პროტესტის შემდეგ მიღწეული შეთანხმების პირობების შესრულება იყო. მეშახტეები ამბობენ, რომ შახტის მდგომარეობის შემოწმების შემდეგ აღმოჩნდა, რომ იქ არაფერი გამოსწორებულა. EMC-ს ინფორმაციით, 10 მარტს ძიძიგურისა და მინდელის შახტების დამაკავშირებელ სავენტილაციო გვირაბში მხუთავი აირით 3 მუშა მოიწამლა.

თებერვალში მეშახტეები საფრთხის შემცველ სამუშაო გარემოს და სამუშაო პირობებს აპროტესტებდნენ. სამუშაო პროცესი მას შემდეგ აღდგა, რაც რეორგანიზაციის ბრძანებაში აისახა ის საკითხები, რომლებიც შრომით და სამართლებრივ უფლებებს არეგულირებდა. 13 მარტს ისინი სწორედ ამ მოთხოვნების შეუსრულებლობის გამო გაიფიცნენ.

გასულ წელს კი, მინდელისა და ძიძიგურის შახტებში, დახლოებით, 30 მეშახტე ჩავიდა და პროტესტის ნიშნად ადგილის დატოვებას არ აპირებდა. მათ გაფიცვა 26 სექტემბერს შეწყვიტეს. ეკონომიკის მინისტრი ამ დღეს ტყიბულში ჩავიდა და მოლაპარაკებების შემდეგ განაცხადა, რომ გამოჩნდა ახალი ინვესტორი კომპანია, რომელმაც იკისრა ვალდებულება, გაისტუმროს სოციალური გადასახადები, მათ შორის, დაზარალებული ოჯახების წინაშე.

ტყიბულში მეშახტეებს იგივე პრობლემებს 2018 წელსაც ჰქონდათ. მაშინ დასაქმებულები პრემიერ-მინისტრ მამუკა ბახტაძესთან შეხვედრას მოითხოვდნენ, რათა მათთვის წარედგინათ ოფიციალური დოკუმენტი, რომ ისინი შახტებში გამოძიების დასრულებამდე, ხელფასებს მიიღებდნენ. ტყიბულში 2018 წლის 16 ივლისს მინდელის შახტაში მომხდარ აფეთქებას 4 ადამიანის სიცოცხლე ემსხვერპლა. ამის გამო, საქართველოს შინაგან საქმეთა სამინისტრომ ტყიბულში არსებული 25-ვე შახტი დალუქა. მაშინდელმა პრემიერმა, მამუკა ბახტაძემ კი განაცხადა, რომ მინდელის შახტის დახურვის განმავლობაში მეშახტეებს ხელფასები აუნაზღაურდებოდათ.