თავდაცვის მინისტრის, ლევან იზორიას განცხადებას იმასთან დაკავშირებით, რომ თავდაცვის სამინისტრო სავალდებულო სამხედრო სამსახურში გაწვევებს აღადგენს, ყოფილი თავდაცვის მინისტრი თინა ხიდაშელი თავის Facebook გვერდზე ეხმაურება. ის ამბობს, რომ საქართველოში არსებული გაწვევის ფორმა ახალგაზრდების იძულებაზეა დამოკიდებული და საბიუჯეტო რესურსსს ფლანგავს:

  • ქვეყნის უსაფრთხოებაზე საუბრისას - "უფრო ეკონომიურია" ძალიან სუსტი და არასერიოზული არგუმენტია.
  • ფინანსური ციკლი კონტრაქტის ვადით ითვლება და 4 წლის პერსპექტივაში, მით უფრო თუ სრულ სამხედრო მომზადებაზე გადავიყვანთ წვევამდელებს, არ არის "უფრო ეკონომიური", აი უფრო უშედეგო კი ნამდვილად არის.
  • გაწვევის იმ ფორმას, რომელიც საქართველოში მოქმედებს რამდენიმე ფუნდამენტური, დემოკრატიულ სახელმწიფოსთან არათავსებადი პრობლემა აქვს ჩვენში: ის სუბიექტურია და სოციალურად უსამართლოა, ადამიანის შრომის გამოყენებას გულისხმობს ანაზღაურების გარეშე, ახალგაზრდის იძულებაზეა დაფუძნებული, და შესაბამისად სახელმწიფოს მოძალადედ აქცევს, ის არ აძლევს ახალგაზრდას შესაძლებლობას დაგეგმოს მისი მომავალი, ის სახელმწიფო სახსრებს მიმართავს ღონისძიებისთვის, რომელსაც სახელმწიფოს/საზოგადოების ინტერესებისთვის შედეგი არ მოაქვს, უბრალოდ ფლანგავს საბიუჯეტო რესურსს, ქმნის თავდაცვის შემძლეთა რაოდენობრივ ილუზიას, და შესაბამისად, ასუსტებს საფრთხის გამკლავების სახელმწიფოს უნარებს.

თინა ხიდაშელი ასევე განმარტავს, თუ რა ღონისძიებას უნდა მიმართოს სამინისტრომ:

  • "ტოტალური თავდაცვა" ახსენა დღეს მინისტრმა. ტოტალური თავდაცვა ასევე, ტოტალურად გაზრდილ თავდაცვის ბიუჯეტს ნიშნავს (შეგახსენებთ მინისტრმა იზორიამ მინისტრობა 5 მილიონიანი კლებით დაიწყო. ეს მისი სულ პირველი ნაბიჯი იყო).
  • თუ ბიუჯეტს ვერ ზრდი, იმ თანხით რომელიც გაქვს პროფესიული ხიშტი უნდა გაამრავლო და ყველა სხვა ხარჯს უბრალოდ უნდა დაემშვიდობო.
  • თუ გაწვევის აღდგენას გეგმავ, 12 ლარიდან 50 ლარამდე გაგიზრდით ანაზღაურებასო კი არ უნდა უთხრათ ახალგაზრდებს, საკანონმდებლო ცვლილებები უნდა გააცნო როგორ მოაგვარებთ მათ პრობლემებს.

7 ნოემბერს მისი თქმით, ლევან იზორიამ განაცხადა, რომ თავდაცვის სამინისტროში წვევამდელების სისტემა აღდგება. მისი თქმით, ამ მხრივ ცვლილებები იგეგმება და ჩამოყალიბდება ახალი სისტემა.