ქართული ნაციონალური ბალეტი სუხიშვილები კორონავირუსის გამო უკრაინაში ტურნეს წყვეტენ. როგორც ანსამბლი ფეისბუქზე წერს, პირველი თებერვლიდან ისინი ტურნეში არიან და უკვე 37 კონცერტი ჩაატარეს.

"გუშინ უკრაინის მთელს ტერიტორიაზე კორონავირუსით გამოწვეული საფრთხის გამო ოფიციალურად გამოცხადდა კარანტინი, რის გამოც ვწყვეტთ ტურნეს და ჩვენი პროდიუსერები ყველა ღონეს ხმარობენ რომ უახლოესი რეისით დაგვაბრუნონ საქართველოში", — ნათქვამია განცხადებაში.

ანსამბლში აცხადებენ, რომ დასის არც ერთ წევრს ვირუსის სიმპტომები არ აღენიშნება:

"ჩამოსვლისთანავე გავივლით სავალდებულო შემოწმებას და დავიცავთ თვითიზოლაციის წესს, რისკენაც მოვუწოდებთ სხვებსაც".

გარდა ამისა, სუხიშვილებმა გააუქმეს თბილისში 3 და 4 აპრილს დაგეგმილი კონცერტი, რომელიც ანსამბლის 75 წლის იუბილეს ეძღვნებოდა. კონცერტი უახლოეს მომავალში გაიმართება.

პანდემია და რეკომენდაციები

მას შემდეგ, რაც ჯანდაცვის მსოფლიო ორგანიზაციამ COVID-19, იგივე კორონავირუსი, საერთაშორისო პანდემიად გამოაცხადა, საქართველოს მთავრობა მუშაობის საგანგებო რეჟიმზე გადავიდა და ახალი შეზღუდვები და რეკომენდაციები გაავრცელა.

საქართველოში კორონავირუსით ინფიცირების 24 შემთხვევაა დადასტურებული: პირველი 26 თებერვალს დაფიქსირდა, მეორე დაავადებათა კონტროლის ცენტრმა 28 თებერვალს დაადასტურა, მესამე — 29 თებერვალს, მეოთხე — 5 მარტს დილით, დანარჩენი 5 კი ამავე დღეს საღამოს, 7 მარტს კორონავირუსით ინფიცირების კიდევ 4 შემთხვევა დადასტურდა, 9 მარტს კორონავირუსი 2 პაციენტს დაუდასტურდა, 10 მარტს კი კორონავირუსის კიდევ 8 შემთხვევა დადასტურდა, კიდევ 1 შემთხვევა კი — 11 მარტს.

ასევე, 4 მარტს კორონავირუსი დაუდგინდა იტალიაში მცხოვრებ საქართველოს მოქალაქეს.

წაიკითხეთ NCDC-სა და WHO-ს რეკომენდაციები კორონავირუსის პრევენციის შესახებ:

ამავე თემაზე: