პარლამენტის თავმჯდომარე, არჩილ თალაკვაძე აცხადებს, რომ საარჩევნო სისტემასთან დაკავშირებით ოპოზიციასთან შეთანხმება შესაძლებელია. ამის შესახებ თალაკვაძემ ქართული ოცნების ოფისში შეხვედრის შემდეგ განაცხადა. მისივე თქმით, შეხვედრა პარტიის თავმჯდომარე, ბიძინა ივანიშვილიც ესწრებოდა.

როგორც არჩილ თალაკვაძემ ჟურნალისტებს უთხრა, მმართველმა გუნდმა ოპოზიციას "სამართლიანი, პრაგმატული და ოპტიმალური პირობები" შესთავაზა, თუმცა შეთანხმების დეტალებზე მან არ ისაუბრა.

"ოპოზიციის ნაწილი ცდილობდა, რომ თავისი რაკურსით ეჩვენებინა საზოგადოებისთვის, ზოგიერთი დეტალი, რომელიც ამ მოლაპარაკების საგანი იყო კიდევ ერთხელ ვამბობ, რომ ხშირად ამ პარტიის წარმომადგენლების განცხადებები იმ რაციონალურ არგუმენტებსა და რეალობას სცდებოდა. ამ მომენტისთვის როგორც ჩვენი მხრიდან, ასევე ოპოზიციის მეორე ნაწილის მხრიდან არის გადადგმული ნაბიჯები იმისთვის, რომ შეთანხმება შედეგს", — აღნიშნა თალაკვაძემ.

გარდა ამისა, პარლამენტის ვიცე-სპიკერმა, მამუკა მდინარაძემ განაცხადა, რომ მათ მომზადებულ მოდელში გათვალისწინებულია ისიც, რომ თუ პარტია არჩევნებში მხარდაჭერის 40 პროცენტზე ნაკლებს მიიღებს, მან ერთპიროვნულად მთავრობის ჩამოყალიბება ვერ შეძლოს.

ოპოზიციის ლიდერის დაკავება და შეწყვეტილი დიალოგი

ოპოზიციასა და ხელისუფლებას შორის დიპლომატების ორგანიზებული მოლაპარაკებები ოპოზიციონერ გიგი უგულავას დაკავების შემეგ ჩაიშალა. თბილისის ყოფილ მერსა და ოპოზიციის ერთ-ერთ ლიდერს პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა.

უგულავას განაჩენის გამოცხადების შემდეგ ოპოზიციამ განაცხადა, რომ საარჩევნო სისტემაზე მთავრობასთან მოლაპარაკებას წყვეტს და საპროტესტო აქციები დაიწყება. მათი თქმით შემდეგომ მოლაპარაკებას აზრი არ აქვს.

სამთავრობო გუნდის ლიდერებმა მომხდარის შეფასება არ ისურვეს და აშშ-ის ელჩთან შეხვედრის დატოვების შემდეგ კი განაცხადეს, რომ მოგვიანებით ისაუბრებენ. დეპუტატებმა კი მომხდარი "ადეკვატურ განაჩენად შეაფასეს".