პარლამენტის პირველი ვიცე-სპიკერი, გია ვოლსკი ამბობს, რომ აქტივისტი ზვიად კუპრავას ცემა თავად ოპოზიციას აწყობდა. მისი თქმით, კუპრავა აღარავის ახსოვდა და გადაწყვიტეს, რომ ეცემათ და ხელისუფლებისთვის დაებრალებინათ.

"ის კა და ის ზვიად კუპრავა არავის აღარ ახსოვს. მოდი, გავლახოთ მაინც იფიქრეს და დავაბრალოთ ქართულ ოცნებას. თუ ვინმეს აწყობდა დღეს ასეთი განცხადებების გაკეთება, მუთუმეტეს გამოუსადეგარი ზვიად კუპრავას გალახვა, ეს არის სწორედ ის პარტია, რომელსაც წარმოადგენს ხმამაღლა მოყვირალი ქალბატონი", — განაცხადა გია ვოლსკიმ.

გუშინ, 28 თებერვალს ზვიად კუპრავას თავს დაესხნენ. როგორც მთავარი არხი ინფორმაციას ავრცელებს, კუპრავას თავდამსხმელები საცხოვრებელ სახლთან დახვდნენ. გავრცელებული კადრებიდან ჩანს, რომ მას დაზიანება თავის არეში აქვს მიყენებული.

ზვიად კუპრავა ამბობს, რომ თავდასხმა მის საქმიანობას უკავშირდება. როგორც კუპრავა განმარტავს, თავდასხმელები მან სახეზე ვერ იცნო.

"ჩამოვედი მანქანიდან, მოვიდა ორი ბიჭი, თითქოს რაღაცის კითხვა უნდოდათ. ამ დროს სახეში რაღაც შემომასხეს. დამწვა სახე, თვალები დავხუჭე და სახის არეში ფეხებით დამიწყეს დარტყმა. ეს იყო თავდასხმა ჩვეულებრივი. ეს არის, რა თქმა უნდა, გახარიას და მათი "ზონდერკამანდის" მოწყობილი", — აღნიშნა კუპრავამ.

შინაგან საქმეთა სამინისტრომ გამოძიება სისხლის სამართლის კოდექსის 126-ე მუხლის პირველი პრიმა ნაწილის "ბ" ქვეპუნქტით დაიწყო, რაც ჯგუფურად ძალადობას გულისხმობს.