პარლამენტის პირველი ვიცე-სპიკერი, გია ვოლსკი ამბობს, რომ მმართველი გუნდი "არ დაუშვებს", რომ არჩევნებზე 40%-ზე ნაკლები მხარდაჭერის მოპოვების შემთხვევაში პარტიამ მთავრობის დაკომპლექტება შეძლოს. მისი თქმით, ქართული ოცნება ოპოზიციას შესთავაზებს ისეთ საარჩევნო სისტემას, სადაც პროპორციულობა "ღირსეულად" იქნება წარმოდგენილი.

"არც დავუშვებთ იმას, რომ 40%-ზე ნაკლები ჰქონდეს პოლიტიკურ პარტიას და იმას ჰქონდეს პრეტენზია, რომ მართოს ქვეყანა. ჩვენი შეთავაზება იქნება ისეთი სისტემა, სადაც პროპორციულიც იქნება ღირსეულად წარმოდგენილი და მაჟორიტარებსაც ექნებათ საშუალება წარმოადგინონ კონკრეტული საარჩევნო ოლქი", — განაცხადა გია ვოლსკიმ.

გუშინ, 27 თებერვალს, უმრავლესობის ლიდერი, მამუკა მდინარაძე აცხადებს, რომ ქართული ოცნება მზადაა, ოპოზიციასთან საარჩევნო სისტემის ისეთ მექანიზმზე შეთანხმდეს, რომელიც 40%-ზე ნაკლები მხარდაჭერის მქონე პოლიტიკურ ძალას მთავრობის დაკომპლექტების საშუალებას არ მისცემს.

ოპოზიციის ლიდერის დაკავება და შეწყვეტილი დიალოგი

მას შემდეგ, რაც ბიძინა ივანიშვილმა დაპირება არ შეასრულა და 2020 წლის საპარლამენტო არჩევნებისთვის პროპორციულ საარჩევნო სისტემაზე გადასვლას უმრავლესობის წევრებმა მხარი არ დაუჭირეს, ოპოზიციასა და მმართველ გუნდს შორის დიპლომატების მედიატორობით დაიწყო. სადაც მმართველმა გუნდი ოპოზიციას პროპორციული მანდატების 100-მდე გაზრდას და მაჟორიტარულის 50-მდე შემცირებას სთავაზობდა.

ოპოზიციასა და ხელისუფლებას შორის დიპლომატების ორგანიზებული მოლაპარაკებები ოპოზიციონერ გიგი უგულავას დაკავების შემდეგ ჩაიშალა. თბილისის ყოფილ მერსა და ოპოზიციის ერთ-ერთ ლიდერს პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა.

უგულავას განაჩენის გამოცხადების შემდეგ ოპოზიციამ განაცხადა, რომ საარჩევნო სისტემაზე მთავრობასთან მოლაპარაკებას წყვეტს და საპროტესტო აქციები დაიწყება. მათი თქმით შემდეგომ მოლაპარაკებას აზრი არ აქვს.

სამთავრობო გუნდის ლიდერებმა მომხდარის შეფასება არ ისურვეს და აშშ-ის ელჩთან შეხვედრის დატოვების შემდეგ კი განაცხადეს, რომ მოგვიანებით ისაუბრებენ. დეპუტატებმა კი მომხდარი "ადეკვატურ განაჩენად შეაფასეს".