საერთაშორისო გამჭვირვალობა — საქართველო წერს, რომ შს ყოფილმა მინისტრმა, ალექსანდრე ჭიკაიძემ საჯარო სამსახურის დატოვების შემდეგ დიდი ოდენობით ქონება საეჭვო გარემოებებში დააგროვა.

ორგანიზაციის მიერ მოძიებული ინფორმაციით, ალექსანდრე ჭიკაიძეს თანამდებობის დატოვების მომენტისთვის არ ჰქონდა დანაზოგი ან თანხა ანგარიშზე და ჰქონდა ბანკის სოლიდური ვალი. მიუხედავადა ამისა, მან და მისმა ცოლმა ორ წელზე ნაკლებ დროში შეძლეს 5 უძრავი ქონების — 224.72 მ² საცხოვრებელი ფართისა და 216.778 მ² მიწის — საეჭვოდ დაბალ ფასში შეძენა, მათ შორის:

  • 2018 წლის 25 მაისს მან 59 266 ლარად მ² შეიძინა 139,62 მ² მშენებარე ბინა და ტერასა ბათუმში, ფიროსმანის ქ. #18-ში;
  • 2018 წლის 17 სექტემბერს 60 ათას ლარად შეიძინა 142,865 მ² სასოფლო-სამეურნეო (სახნავი) მიწა წინანდალში;
  • იმავე დღეს 30 ათას ლარად შეიძინა 72,113 სასოფლო-სამეურნეო (სახნავი) მიწა ასევე წინანდალში;
  • 2019 წლის 7 მარტს 40 ათას ლარად შეიძინა 1 800 მ² სასოფლო-სამეურნეო (სახნავი) მიწა საგურამოში;
  • 2019 წლის 20 ნოემბერს ალექსანდრე ჭიკაიძის მეუღლემ, ნათია ოკრიბელაშვილმა ბაკურიანში 10 ათას დოლარად 85,1 მ² კოტეჯი შეიძინა.

საერთაშორისო გამჭვირვალობა საქართველო აღნიშნავს იმასაც, რომ სხვადასხვა თანამდებობაზე ყოფნის დროს ალექსანდრე ჭიკაიძე არაკეთილსინდისიერად ავსებდა ქონებრივი მდგომარეობის დეკლარაციებს.

ალექსანდრე ჭიკაიძე შინაგან საქმეთა სამინისტროს 2013 წლის 20 ნოემბრიდან 2015 წლის 23 იანვრამდე ხელმძღვანელობდა. შემდეგ იგი სახელმწიფო უსაფრთხოებისა და კრიზისების მართვის საბჭოს მდივნის მოადგილედ დაინიშნა, თუმცა საბჭო 2017 წლის ნოემბერში გაუქმდა. 2018 წლის იანვრიდან ჭიკაიძე ჭიდაობის ეროვნული ფედერაციის ვიცე-პრეზიდენტის პოზიციას იკავებს.