Youtube-ში გავრცელდა ვიდეო, რომელშიც ასახულია, რომ ევროპაში მცხოვრებ ჩეჩენ ბლოგერს, ტუმსო აბდურახმანოვს სახლში თავს დაესხნენ. ვიდეორგოლი უფლებადამცველმა ფონდმა Vayfond-მა გაავრცელა.

როგორც BBC-ის რუსული სამსახური წერს, აბდურახმანოვი ერთ-ერთი ყველაზე ცნობილი ჩეჩენი ბლოგერია, რომელსაც ევროპაში გაქცევა მოუწია, რადგან ჩეჩნეთის პრეზიდენტ რამზან კადიროვის ნათესავებთან კონფლიქტი მოუვიდა. მისი ვიდეოები, სადაც ის რუსეთის ხელისუფლებას აკრიტიკებს, მილიონობით ნახვას აგროვებს. რუსეთში მის წინააღმდეგ სისხლის სამართლის საქმეა აღძრული.

უფლებადამცველები აცხადებენ, რომ თავდამსხმელი 26 თებერვალს ბლოგერის სახლში შეიჭრა და მძინარეს თავში ჩაქუჩი ჩაარტყა. აბდურახმანოვმა შეძლო თავდამსხმელის განიარაღება და პოლიცია გამოიძახა. თვითონ ბლოგერი საავადმყოფოშია გადაყვანილი. თავდასხმის შესახებ ინფორმაცია ადასტურებს მისი ძმაც.

Vayfond-ის უფლებადამცველი ამინა სადულაევა ამბობს, რომ პოლიციის მისვლამდე ბლოგერმა ბევრი სისხლი დაკარგა და თითქმის უგონო მდგომარეობაში იყო.

YouTube-ზე გამოჩენილი ვიდეო კი პირდაპირი ეთერი იყო, რომელიც ბლოგერმა თავის ერთ-ერთ ანგარიშზე ჩართო. BBC-ის ინფორმაციით, ვიდეოდან ჩანს, რომ თავდამსხმელიც დაშავებულია.