ზვარეში, რკინიგზის მშენებლობაზე ერთ-ერთი დასაქმებული მინდია ოკრიბელაშვილი On.ge-სთან საუბარში ჰყვება, რომ მშენებელი კომპანიის წარმომადგენლები მას შემდეგ გახდნენ აგრესიულები, რაც მუშები რამდენიმე დღით გაიფიცნენ და პროტესტის შედეგად შრომითი ხელშეკრულება გააფორმეს. მისი თქმით, იგი დღევანდელ ფაქტს შეესწო:

"დღეს, როდესაც სამუშაოდ მივედით, ვიცვლიდით და გამოგვიყვანა დამსაქმებელმა გარეთ, ხელში ნაჯახები და დანები ეჭირათ. წუხელ ადგილობრი მაცხოვრებლები ცემეს და დღესაც ანალოგიურად გააგრძელეს იგივე სიტუაცია. რაღაც აგრესია აქვთ, მას შემდეგ რაც გაფიცულები ვიყავით და შრომითი ხელშეკრულება გაგვიფორმეს".

მისივე თქმით, პოლიცია დღესაც იყო მისული შემთხვევის ადგილზე. მინდია ოკრიბელაშვილი ჰყვება, რომ მან დაინახა როგორ ჩამოართვა პოლიციელმა ერთ-ერთ თავდამსხმელს ხორცის საჩეხი დანა.

შინაგან საქმეთა სამინისტრომ On.ge-ს განუცხადა, რომ აღნიშნულ ფაქტთან დაკავშირებით გამოძიება სისხლის სამართლის კოდექსის 125-ე მუხლით დაიწყო, რაც ცემას გულისხმობს. უწყება დამატებით დეტალებზე არ საუბრობს.

რკინიგზელთა ახალი პროფკავშირის ინფორმაციით, ხარაგაულის რაიონის სოფელ ზვარეში, რკინიგზის ლიანდაგის მშენებლობაზე დასაქმებული რამდენიმე მუშა კომპანია ჩინეთის რკინიგზის 23-ე ბიუროს წარმომადგენლებმა სცემეს. მათი ცნობით, ჰოსპიტალიზირებულია 5 მუშა და 2 ადგილობრივი მაცხოვრებელი. ამის შესახებ დღეს, 3 ნოემბერს, პროფკავშირმა განცხადება გაავრცელა.