საქართველოს პრეზიდენტმა, სალომე ზურაბიშვილმა იუნკერთა ხსოვნისადმი მიძღვნილ ღონისძიებაზე პარლამენტში პროტესტის ნიშნად ჩართულ საბჭოთა კავშრის ჰიმნზე ისაუბრა. მისი თქმით, ეს საქციელი იუნკერთა ხსოვნის შეურაცხყოფაა.

"მე ძალიან ვწუხვარ, რომ დღეს აქ ყველა პოლიტიკური ძალა და მთლიანად საზოგადოება არ არის შეკრებილი. სამწუხაროდ, ამას წინ უძღოდა ის, რომ ვიღაცამ გაბედა და ამ ადგილას გააჟღერა საბჭოთა ჰიმნი. ეს არის ამათი [იუნკერების] შეურაცხყოფა. ყველაფერი შეიძლება, ყველანაირი კრიტიკა, ყველანაირი დაცინვა, მაგრამ რაღაცეები არის, რაც არ შეიძლება", — განაცხადა პრეზიდენტმა.

ზურაბიშვილს სსრკ ჰიმნის ჩართვა აქამდეც ჰქონდა შეფასებული. პირველად მან განაცხადა, რომ ეს უკანონობა და სახელმწიფოს შეურაცხყოფაა.

პრეზიდენტი, პრემიერი, პარლამენტის თავმჯდომარე და თავდაცვის მინისტრი იუნკერთა ხსოვნისადმი მიძღვნილ ღონისძიებას დაესწრნენ, რომელიც პარლამენტის ეზოში გაიმართა. პარლამენტში არსებულ სამლოცველოში გაიმართა იუნკერთა მოსახსენიებელი პარაკლისიც.

99 წლის წინ, 1921 წლის 23 თებერვალს იუნკერები საქართველოს დამოუკიდებლობისთვის ბრძოლაში საბჭოთა არმიას ემსხვერპლნენ. ყოველ წელს მათი ხსოვნის პატივსაცემად სპეციალური ღონისძიებები იმართება.