მთავარი პროკურატურის ინფორმაციით, გამოძიების დეპარტამენტის გადაწყვეტილებით, სულხან მოლაშვილის ოჯახს სოფელ წავკისში მდებარე აგარაკი უკანონოდ ჩამოერთვა, რომელიც უკან დაუბრუნდება.

2004 წლის 23 აპრილს, პროკურატურას, სამსახურებრივი უფლებამოსილების ბოროტად გამოყენების ფაქტზე, ბრალდებულის სახით დაკავებული ჰყავდა საქართველოს კონტროლის პალატის ყოფილი თავმჯდომარე სულხან მოლაშვილი, რომელსაც აღკვეთის ღონისძიების სახით შეეფარდა პატიმრობა და ის სასჯელაღსრულების დაწესებულებაში იმყოფებოდა.

პროკურატურის ცნობით, დეპარტამენტმა ქონების უკანონოდ ჩამორთმევის დანაშაულებრივი ფაქტი გახსნა:

"2004 წლის ივლისში, სულხან მოლაშვილის ძმას - თორნიკე მოლაშვილს დაუკავშირდნენ პროკურატურიდან და სულხან მოლაშვილისთვის აღკვეთის ღონისძიების სახით შეფარდებული პატიმრობის არასაპატიმრო ღონისძიების შეცვლის სანაცვლოდ, მოსთხოვეს ქ. თბილისში, სოფელ წავკისში მდებარე ერთ-ერთი აგარაკის შეძენა და შემდგომში სახელმწიფოსთვის უსასყიდლოდ გადაცემა.

მას შემდეგ, რაც სულხან მოლაშვილის ოჯახის წევრები: მისი ძმა თორნიკე მოლაშვილი და მისი მეუღლე თამთა ბახტურიძე დაარწმუნეს, რომ მოთხოვნის შესრულების შემთხვევაში, მოხდებოდა სულხან მოლაშვილის საპატიმრო დაწესებულებიდან გათავისუფლება, ისინი იძულებულნი გახდნენ დათანხმებოდნენ ამ პირობის შესრულებას.

ამ მიზნით, სულხან მოლაშვილის ოჯახის წევრებმა ბანკიდან აიღეს სესხი და შეთანხმებისამებრ, 2004 წლის 14 ივლისს, 140 000 ლარად შეიძინეს სოფელ წავკისში მდებარე აგარაკი, რომელიც იმავე დღეს, უსასყიდლოდ გადასცეს სახელმწიფოს".

პროკურატურის ცნობით, მიუხედავად სულხან მოლაშვილის ოჯახის წევრების მიერ მოთხოვნის შესრულებისა, სულხან მოლაშვილისთვის აღკვეთის ღონისძიება არ შეცვლილა და ის საპატიმრო დაწესებულებიდან არ გაუთავისუფლებიათ.

პროკურატურა შუამდგომლობით მიმართავს საქართველოს ეკონომიკისა და მდგრადი განვითარების სამინისტროს, რათა საქართველოს მთავრობის განკარგულებით, მოლაშვილის ოჯახს ამჟამად სახელმწიფოს ბალანსზე არსებული მათი შეძენილი აგარაკი უკან დაუბრუნდეს.

პროკურატურა ქონების უკანონოდ ჩამორთმევაში მხილებულ ყოფილ საჯარო მოხელეების მიმართ, გამოძიებასთან თანამშრომლობის ხარისხის გათვალისწინებით, სისხლის სამართლებრივ დევნას არ დაიწყებს.

სულხან მოლაშვილი 2016 წლის 29 ივნისს გარდაიცვალა.