პრემიერ-მინისტრის, გიორგი გახარიას განცხადებით, საქართველოზე კიბერშეტევა მიზნად ისახავდა სუვერენიტეტისთვის ძირის გამოთხრას. ამის შესახებ გახარიამ ტვიტერის ოფიციალურ გვერდზე დაწერა.

გახარიამ დასავლელ პარტნიორებს, მათ შორის აშშ-ის სახელმწიფო მდივანს, მაიკ პომპეოსა და გაერთიანებული სამეფოს საგარეო საქმეთა სახელმწიფო მდივანს, დომინიკ რააბს საქართველოს ძლიერი მხარდაჭერისთვის მადლობა გადაუხადა. გახარიამ ტვიტში არ ახსენა რუსეთი, რომლიდანაც კიბერშეტევა მოხდა.

საგარეო საქმეთა სამინისტროს ინფორმაციით, საერთაშორისო პარტნიორებთან თანამშრომლობით გაირკვა, კიბერშეტევა რუსეთის ფედერაციის შეიარაღებული ძალების გენერალური შტაბის მთავარი სამმართველოს მიერ დაიგეგმა და განხორციელდა.

2019 წლის 28 ოქტომბერს ერთდროულად 15 ათასზე მეტი ვებგვერდი დაიჰაკა. კიბერთავდასხმის მსხვერპლი პრეზიდენტის ადმინისტრაციის, სასამართლო სისტემის, სხვადასხვა მუნიციპალიტეტის საკრებულოს, სახელმწიფო, კომერციული და მედია ორგანიზაციების ვებგვერდები გახდა. მაშინ ვებგვერდებზე გამოჩნდა ყოფილი პრეზიდენტის, მიხეილ სააკაშვილის ფოტო წარწერით "I'll Be Back".

გაიგეთ მეტი: