პარლამენტის თავმჯდომარე, არჩილ თალაკვაძე ევროკავშირთან ასოცირების კომიტეტის სხდომაზე რეზოლუციის ჩავარდნას ეხმაურება და ამბობს, რომ ასოცირების დეკლარაციის საკითხი საქართველოს ევროპულ არჩევანს ვერ შეცვლის.

თალაკვაძემ ასოცირების რეზოლუციაზე საუბრისას, ხაზი გაუსვა ასოცირების კომიტეტის სხდომაზე ევროპის სახალხო პარტიის წევრების აქტიურობას და აღნიშნა, რომ პარტია ნაციონალური მოძრაობის პარტნიორია.

"ევროპის სახალხო პარტია, რომელიც 2012 წელსაც და მანამდეც იყო ნაციონალური მოძრაობის მოკავშირე პარტია. ისიც გახსოვთ, რომ 2012 წლის და შემდეგი წლის არჩევნებში გაიმარჯვა ქართულმა ოცნებამ. ეს არის პოლიტიკური პროცესი, ევროპარლამენტიც არის პოლიტიკური ორგანო და ბუნებრივია, იქაც პოლიტიკური განსხვავებები არის ნორმალური", — განაცხადა არჩილ თალაკვაძემ.

13 თებერვალს ევროპარლამენტში ასოცირების ხელშეკრულებით გათვალისწინებული ერთობლივი რეზოლუცია ჩავარდა. საბოლოო ვერსიის მხარდასაჭერად ევროპარლამენტისა და საქართველოს პარლამენტის დეპუტატების უმრავლესობის მხარდაჭერა იყო საჭირო.

რეზოლუციის შესწორებები მოამზადეს მმართველი გუნდის წარმომადგენლებმა, ოპოზიციამ და, ასევე, ევროპარლამენტარების ნაწილმა. ქართულმა ოცნებამ სწორედ ოპოზიციის შესწორებებს არ დაუჭირა მხარი.