მამა ანდრია სარია, რომელსაც საპატრიარქომ მღვდელმსახურება შეუჩერა, ამბობს, რომ ერთ-ერთ ეპისკოპოსს სქესობრივი კავშირი ჰქონდა მონაზონთან და მას ბერმა შეუსწრო. ამის შესახებ მან ტელეკომპანია მთავართან ისაუბრა.

სარია ყვება, რომ ამის შესახებ მან პატრიარქის მოსაყრდე მეუფე შიოსთანაც ისაუბრა, თუმცა მან და სხვა მღვდელმსახურებმა მისი მოსმენა არ ისურვეს. სარია ამბობს, რომ ბერი, რომელმაც ეპისკოპოსი ამხილა და მისი მძღოლიც იყო, ამაზე პატრიარქსაც ესაუბრა:

"როდესაც მივიდა ეს ბერი და უთხრა პატრიარქს, რომ მე ვნახე ეს ყველაფერი, უთხრა, რომ ის უნდა განიკვეთოსო ანდა მე წავალ ეკლესიიდანო. ერთ კვირაში დაიბარეს და ამ საკითხზე პასუხს გეტყვიო. ერთ კვირაში რომ მივიდა, ჯობია შენ წახვიდეო. ეს ბერი განიმოსა და ახლა საბურთალოზე ბინაში ცხოვრობს", — ყვება სასულიერო პირი.

როგორც მთავარი არხი აცხადებს, სასულიერო პირმა მათ გადასცა იმ სხდომის აუდიოჩანაწერი, რომელზეც ანდრია სარია დაიბარეს და განუცხადეს, რომ მისი განცხადებების გამო შენიშვნას აძლევდნენ. სწორედ ამ სხდომაზე ისაუბრა სარიამ ერთ-ერთი ეპისკოპოსის სქესობრივ კავშირზე. ტელეკომპანიის განმარტებით, 16-წუთიანი აუდიოჩანაწერი ორივე მხარის თანხმობით გაკეთდა.

აუდიოჩანაწერში სავარაუდოდ ისმის მამა ანდრია სარიას, მეუფე შიოსა და კიდევ ორი ეპისკოპოსის საუბარი:

მამა ანდრია: არ მაძლევთ საშუალებას დასაბუთებისა მე რას ვგულისხმობ...

მეუფე შიო: ვინ არ მოგცა შენ საშუალება? დღეს ჩვენ ამ თემაზე არ ვსაუბრობთ?

მამა ანდრია: რატომ?

მეუფე შიო: იმიტომ, რომ შენ დღეს ჩვენ დაგიბარეთ, რომ მოგცეთ შენიშვნა...

აუდიოჩანაწერში, სავარაუდოდ, ატენისა და გორის მიტროპოლიტი სარიას ეუბნება, რომ ის ბევრს ლაპარაკობს:

მამა ანდრია: ნუ მეჩხუბებით.

მეუფე ანდრია გვაზავა: ჭკუას ნუ მასწავლი...

მამა ანდრია: ნუ მეჩხუბებით.

მეუფე ანდრია გვაზავა: ნუ მასწვალი-მეთქი ჭკუას გეუბნები... მამა ანდრია, ე.ი ბევრს ლაპარაკობ, სამწუხაროდ, და თავხედურად ლაპარაკობ...

მამა ანდრია სარიას, რომელიც ჭყონდიდის ეპარქიიდან მეუფე პეტრეს ჩამოშორების შემდეგ მას უჭერდა მხარს და საპატრიარქოს აკრიტიკებდა, მღვდელმსახურების უფლება შეუჩერეს. საპატრიარქოს პრესსამსახურის ხელმძღვანელმა, მამა ანდრია ჯაღმაიძემ ეს იმით განმარტა, რომ სარიამ არ გაითვალისწინა საპატრიარქოს გაფრთხილება საჯარო განცხადებების შესახებ.

თავად მამა ანდრია ამ გადაწყვეტილებას არაკანონიკურად მიიჩნევს.

გაიგეთ მეტი მამა ანდრიაზე: