ესტონელი ევროპარლამენტარი და სოციალ-დემოკრატიული ალიანსის წევრი, სვენ მიქსერი "შემაშფოთებელს" უწოდებს იმას, რომ საქართველოში საარჩევნო კანონმდებლობის შეცვლასთან დაკავშირებული მოლაპარაკებები ჩაიშალა. სვენ მიქსერი არის მომხსენებელი საქართველოს საკითხზე, ხოლო ალიანსში, რომელსაც ის წარმოადგენს, ქართული ოცნება შედის.

ფორმულასთას ექსკლუზიურ ინტერვიუში იგი ამბობს, რომ ოპოზიციის ლიდერის დაკავება გაართულებს საარჩევნო კანონმდებლობის ცვლილებების პროცესს.

"გიგი უგულავას დაკავება არის მოვლენა, რომელიც ძირს უთხრის პოლიტიკურ ნდობას, განსაკუთრებით ოპოზიციური პარტიების მხრიდან... მმართველ პარტიას განსაკუთრებული პასუხისმგებლობა აკისრია, ამიტომ, მნიშვნელოვანია, რომ საუბარია კომპრომისზე ხელისუფლებამ შესაბამისი პასუხი გასცეს ოპოზიციის შეთავაზებას", — ამბობს ევროპარლამენტის წევრი ფორმულას თარგმანის მიხედვით.

უგულავას დაკავება და შეწყვეტილი დიალოგი

თბილისის ყოფილ მერსა და ოპოზიციის ერთ-ერთ ლიდერს, გიგი უგულავას პატიმრობაში ყოფნა ისევ 3 წლით, 2 თვითა და 8 დღით მოუწევს. საქმეზე, რომელზეც უგულავა რამდენიმე წლის წინ მსჯავრდებული იყო, გადაწყვეტილება უზენაესმა სასამართლომ დღეს, 10 თებერვალს გამოაცხადა. საკასაციო საჩივარი ყოფილმა გენერალურმა პროკურორმა და ახლადარჩეულმა მოსამართლემ შალვა თადუმაძემ განიხილა.

როგორც მისმა ადვოკატმა, ბექა ბასილაიამ თქვა, უგულავა უზენაესმა სასამართლომ იმ მუხლით გაასამართლა, რომლითაც 9-წლიანი პატიმრობა იყო გათვალისწინებული. თუმცა, ამ მუხლზე ამნისტია გავრცელდა, განახევრდა. იმის გამო, რომ მას მოხდილი ჰქონდა წელიწადი და ოთხი თვე, პატიმრობაში ყოფნა სამ წელზე მეტ ხანს მოუწევს.

უგულავას განაჩენის გამოცხადების შემდეგ ოპოზიციამ განაცხადა, რომ საარჩევნო სისტემაზე მთავრობასთან მოლაპარაკებას წყვეტს და საპროტესტო აქციები დაიწყება. მათი თქმით შემდეგომ მოლაპარაკებას აზრი არ აქვს.

სამთავრობო გუნდის ლიდერებმა მომხდარის შეფასება არ ისურვეს და აშშ-ის ელჩთან შეხვედრის დატოვების შემდეგ კი განაცხადეს, რომ მოგვიანებით ისაუბრებენ. დეპუტატებმა კი მომხდარი "ადეკვატურ განაჩენად შეაფასეს".