სახელმწიფო დეპარტამენტის საგარეო ოპერაციების 2021 წლის ფისკალური ბიუჯეტით, აშშ საქართველოს რუსეთის აგრესიასთან და რუსულ გავლენებთან საბრძოლველად ფინანსურად დაეხმარება.

დოკუმენტით გათვალისწინებულია, რომ აშშ ევროპაში $170 მილიონს დახარჯავს, ხოლო დახმარების მიმღები პრიორიტეტული ქვეყნები არიან: უკრაინა, საქართველო, ესტონეთი, ლატვია და ლიეტუვა.

"უსაფრთხოების სტრატეგიული პრიორიტეტია რუსეთის გავლენასთან, რუსულ აგრესიასთან ბრძოლა პარტნიორებისა და მოკავშირეების შესაძლებლობების გაძლიერებით. მათ უნდა შეძლონ საკუთარი თავდაცვის უზრუნველყოფა ნატოსთან ფუნქციონალური თავსებადობით. ფინანსური დახმარება ითვალისწინებს, მიმღები ქვეყნები უზრუნველყოფილი იყვნენ აღჭურვილობით, მათ შორის, ტაქტიკური აღჭურვილობით დაზვერვისთვის, ზედამხედველობისთვის და, ასევე, ჩატარდეს წვრთნები", — ნათქვამია ბიუჯეტის პროექტში.

კიდევ ერთი პროგრამით (IMET) აშშ ევროპაში რიგ ქვეყნებს 25,5 მილიონით დაეხმარება. დაფინანსების მიღებისას პრიორიტეტი მიენიჭება ბულგარეთს, საქართველოს, პოლონეთს, რუმინეთს, თურქეთსა და უკრაინას. ისიც ითვალისწინებს დახმარებას რუსეთის აგრესიასთან საბრძოლველად. მისი მიზანია, გააღრმავოს რეგიონალური უსაფრთხოება და ფუნქციონალური თავსებადობა აშშ-ს, ნატოსა და ევროპის შეიარაღებულ ძალებს შორის.