ევროკავშირი-საქართველოს ასოცირების შეთანხმების შესრულების ბოლო ანგარიშში წერია, რომ გამოწვევები რჩება საარჩევნო რეფორმასთან, პოლიტიკურ დიალოგთან და სასამართლო ხელისუფლების რეფორმირებასთან მიმართებით. ამასთან, ნათქვამია, რომ საქართველო კვლავ ერთგულად ასრულებს შეთანხმებით ნაკისრ ვალდებულებებს.

დღეს, 7 თებერვალს ევროკომისიამ ასოცირების ხელშეკრულების შესრულების ანგარიში გამოაქვეყნა. დოკუმენტი წინ უსწრებს ევროკავშირი-საქართველოს ასოცირების საბჭოს გამართვას, რომელიც გაზაფხულზეა დაგეგმილი. ანგარიში მოიცავს 2019 წლის მარტიდან პერიოდს.

დოკუმენტში წერია, რომ უმნიშნელოვანესია, მოიძებნოს ისეთი გამოსავალი საარჩევნო სისტემაზე, რაც ყველა მხარისათვის მისაღები იქნება.

"2020 წელი მნიშვნელოვანი იქნება საქართველოსთვის, გააგრძელოს ვალდებულებად ნაკისრი რეფორმები. ეს იქნება გადამწყვეტი, შემდეგი წინსვლისთვის ევროპულ გზაზე. საკვანძო საკითხი იქნება, რომ საქართველომ წინ წაწიოს ამბიციური საარჩევნო რეფორმა, რათა გაუმკლავდეს პოლიტიკურ პოლარიზაციასა და, ასევე, განახორციელოს სასამართლო რეფორმაც.

ველით, რომ 2020 წლის საპარლამენტო არჩევნები იქნება საქართველოს დემოკრატიულობის განმსაზღვრელი. 2018 წლის საპრეზიდენტო არჩევნებზე გავრცელებული ეუთოს რეკომენდაციები საარჩევნო რეფორმის მიზანი უნდა გახდეს", — ვკითხულობთ ანგარიშში.

ამასთან, დოკუმენტის თანახმად, თავისუფალი და პლურალისტური გარემოს შექმნა მედიისთვის იქნება კიდევ ერთი მნიშნელოვანი ფაქტორი მომდევნო არჩევნებზე.

ანგარიშში საუბარია უზენაესი სასამართლოს მოსამართლეების შერჩევის პროცესზეც. ავტორები მიუთითებენ იმაზე, რომ კრიტიკულად მნიშვნელოვანია, საქართველომ გააგრძელოს სასამართლოს სისტემაში ეთიკისა და კეთილსინდისიერების უმაღლესი სტანდარტების მისაღწევად მუშაობა:

"მნიშვნელოვანესია, რომ უზენაესი სასამართლოს მოსამართლეების არჩევისას გათვალისწინებული იყოს ვენეციის კომისიის ყველა რეკომენდაცია და პროცედურა იყოს გამჭვირვალე".

ასევე, ევროკომისია მიიჩნევს, რომ რეფორმების მეოთხე ტალღის განხორციელება მნიშვნელოვანი იქნება 2020 წლის განმავლობაში.

ანგარიშში საუბარია უვიზო მიმოსვლაზეც, რაზეც ევროკომისია საქართველოს მიმართავს, რომ უფრო დროული რეაგირება მოახდინოს არალეგალი მიგრანტებისა და თავშესაფრის მაძიებელთა გაზრდილ რიცხვზე. მათი რეკომენდაციით, ეს ყველაფერი ევროკომისიასთან და ევროკავშირის წევრ ქვეყნებთან ახლო თანამშრომლობით უნდა მოხდეს.

გარდა ამისა, ევროკომისიაში მიაჩნიათ, რომ საჭიროა სტრუქტურული რეფორმები, რათა საქართველოს ეკონომიკა იყოს ნაკლებად მოწყვლადი, განვითარდეს საინვესტიციო გარემო და სავაჭრო პოტენციალი.