ქართული ოცნების გენერალური მდივანი, კახა კალაძე მიიჩნევს, რომ ოპოზიციური პარტიების მიერ შეთავაზებული ე.წ. გერმანული მოდელი ქვეყანას უკან დააბრუნებს. ასე გამოეხმაურა ის ეუთო/ოდირის დასკვნას.

"ის, რაზეც ოპოზიცია საუბრობს, გერმანულ მოდელთან საერთო არ აქვს. ეს არის ავღანური მოდელი. პირდაპირ გეტყვით, საქართველო 80-იან, 70-იან და 90-იან წლებში ვერ და არ დაბრუნდება. ჩვენ გვჭირდება განვითარება, წინსვლა. საარჩევნო სისტემებ არ და ვერ იგებს არჩევნებს. არჩევნებს იგებს ხალხი. არჩევნებს საარჩევნო სისტემები რომ იგებდეს, პრეზიდენტი იქნებოდა ისევ მიხეილ სააკაშილი", — თქვა მან.

ეუთო/ოდირის დასკვნა საარჩევნო სისტემის ცვლილებაზე გუშინ, 5 თებერვალს გამოქვეყნდა. ეუთოს დოკუმენტში აღნიშნულია, რომ საარჩევნო მოდელთან დაკავშირებით გადაწყვეტილების მიღება ქვეყნის სუვერენული უფლებაა, თუმცა ასევე, წერია ისიც, რომ კანონის კონსტიტუციასთან შესაბამისობაზე საბოლოო გადაწყვეტილება ადგილობრივმა სასამართლოებმა უნდა მიიღონ.

დოკუმენტში აღნიშნულია ისიც, რომ შემოთავაზებული ე.წ. გერმანული მოდელი აკმაყოფილებს უნივერსალური, თავისუფალი, ფარული და პირდაპირი ხმის მიცემის, ასევე, პერიოდული არჩევნების პრინციპებს.

ეუთო აცხადებს, რომ ნებისმიერი საარჩევნო ცვლილება საგულდაგულოდ უნდა განიხილონ და პარტიებმა ფართო კონსესუსით მიიღონ.