ნაციონალური მოძრაობის ერთ-ერთი ლიდერი, რომან გოცირიძე ქართული ოცნების მიერ, ამერიკაში ლობისტურ კომპანიასთან ხელშეკრულების განახლებაზე ამბობს, რომ ყორანი ქვიშით რაც არ უნდა ხეხო, მაინც ვერ გათეთრდება.

"ვერ იტყვის ვერცერთი ლობისტი შავზე თეთრს. როგორც ამბობენ, რაც არ უნდა ხეხო ყორანი ქვიშით, ის ვერ გახდება თეთრი. ვერ გათეთრდება ოცნება, რაც არ უნდა ხეხო ფულითა, ვერ შველის ფული ქართული ოცნებისა და ბიძინა ივანიშვილის გაფუჭებული სახის გაუმჯობესებას", — თქვა რომან გოცირიძემ.

საქართველოს მთავრობამ აშშ-სთან ურთიერთობების განმტკიცებისა და კავშირების დამყარებისთვის ლობისტურ კომპანია Chartwell strategy group-თან ხელშეკრულება განაახლა. დოკუმენტი 27 იანვრით თარიღდება და აშშ-ს იუსტიციის დეპარტამენტის გვერდზეა განთავსებული.

ამ ლობისტურ კომპანიას საქართველოს მთავრობა, მომსახურებისთვის ანაზღაურების სახით, 2019 წლის ხელშეკრულებით ყოველთვიურად 65 ათას დოლარს უხდიდა.