საგარეო საქმეთა სამინისტროს ინფორმაციით, ჩინეთის ქალაქ უხანიდან, საქართველოს მოქალაქეების ევაკუაციისთვის მოლაპარაკებები თურქეთთან მიმდინარეობს.

"მიმდინარეობს აქტიური მუშაობა ჩვენი მოქალაქეების ევაკუაციის საკითხზე და იმედს ვიტოვებთ, რომ აღნიშნული რეისით მოხდება მათი წამოყვანა უხანის პროვინციიდან", — თქვა საგარეო საქმეთა სამინისტროს პრესსამსახურმა.

ქალაქი უხანი კორონავირუსის გავრცელების ეპიცენტრია. ჯერჯერობით უცნობია, როგორ დასრულდება მოლაპარაკებები და სად განთავსდებიან ევაკუირებული მოქალაქეები. ევაკუაციასთან დაკავშირებით ჯანდაცვის მინისტრმა, ეკატერინე ტიკარაძემ 29 იანვარს ისაუბრა და თქვა, რომ ქართული მხარე ფრენებსაც აკრძალავს.

20-ზე მეტი მოქალაქის ევაკუაციას თურქეთი რამდენიმე დღეში დაიწყებს, უცნობია თვითმფრინავები ჩავლენ სტამბულში თუ ანკარაში. თურქეთისა და საქართველოს გარდა უხანიდან მოქალაქეების ევაკუაცია არაერთმა ქვეყანამ დაიწყო.ჩინეთში კორონავირუსით გარდაცვლილთა რიცხვი 170-მდე გაიზარდა, დაინფიცირებულთა რაოდენობა კი 7 700-ზე მეტია. ბოლო მონაცემებით, ვირუსი ჩინეთის 31 რეგიონში გავრცელდა და მთელი ქვეყანა მოიცვა.

მთელი მსოფლიოს მასშტაბით კორონავირუსის 100-ზე მეტი შემთხვევა დადასტურდა. ვირუსი გავრცელდა 20-ზე მეტ ქვეყანაში, მათ შორის, ჩრდილოეთ ამერიკა, ევროპა, აზია და შუა აღმოსავლეთი. ადამიანიდან ადამიანზე გადადების შემთხვევები კი ყველაზე მეტად გერმანიაში დაფიქსირდა.

გაიგეთ მეტი: