თბილისი პრაიდის განცხადებით, ევროპის საბჭოს საპარლამენტო ასამბლეის სესიაზე საქართველოს პრეზიდენტმა და საგარეო საქმეთა მინისტრმა ევროპელ კოლეგებს ცრუ ინფორმაცია მიაწოდეს. თბილისი პრაიდი დავით ზალკალიანისა და სალომე ზურაბიშვილის გამოსვლას "პრობლემის უარყოფასა" და "ისტორიის გაყალბებას" უწოდებს.

კერძოდ, დავით ზალკალიანის განცხადებით, მუქარების მიუხედავად "ღირსების მარში" მშვიდობიანად ჩატარდა და ეს ხელისუფლების დამსახურებად მოიხსენია. ხოლო, პრეზიდენტის თქმით, "ხელისუფლება ყველაფერს აკეთებს საიმისოდ, რომ დაცულ იქნას ეს [ლგბტი] უფლებები და გამოხატვის თავისუფლება" და რომ "სამართალდამცველებმა მოახერხეს ამ სიტუაციების მართვა".

საგარეო მინისტრმა, ასევე, აღნიშნა, რომ ბოლო წლების განმავლობაში თითქოსდა ხელისუფლებამ გადადგა არაერთი ქმედითი ნაბიჯი ანტიდისკრიმინაციული კანონმდებლობის ეფექტურად აღსრულებისთვის - "განახორციელა კვლევები და საინფორმაციო კამპანიები". მისივე თქმით, "ხელისუფლების, პოლიტიკოსების, საჯარო ფიგურები ლგბტი უფლებებს დიდ ყურადღებას აქცევენ და გმობენ თავდასხმებს და ლგბტი პირების გამოხატვის თავისუფლების დარღვევებს".

თბილისი პრაიდი განცხადებაში იხსენებს, რომ საქართველოს ხელისუფლებამ "ღირსების მარშის" დაცვაზე 2019 წელს პირდაპირი და საჯარო უარი განაცხადა:

"სახელმწიფო არაფერს აკეთებდა თბილისში სიძულვილის ჯგუფების მიერ ღია მუქარებისა და ძალადობის აღსაკვეთად და მეტიც, თავად იყენებდა უკიდურესად არადემოკრატიულ მეთოდებს ჩვენს წინააღმდეგ. ხელისუფლება მუდმივად გვთხოვდა "ღირსების მარშის" გაუქმებას და საბოლოოდ კი, ერთ-ერთ ოპოზიციურ პარტიასთან თანამშრომლობასა და ქვეყნის დესტაბილიზაციის მცდელობაში დაგვადანაშაულა".

თბილისი პრაიდი, ასევე, აცხადებს, რომ საქართველოს ხელისუფლება დღემდე არ აღიარებს ჰომოფობიას, როგორც სოციალურ პრობლემას და "ადგილობრივ თუ საერთაშორისო დონეზე ახდენს სიცრუის ტირაჟირებას".