ორწლიანი შუალედის შემდეგ ტელეარხმა FX-მა ოფიციალურად დაადასტურა, რომ წელს ერთ-ერთი ყველაზე გახმაურებული სერიალის, American Crime Story-ის მესამე სეზონს ვიხილავთ.

რამდენიმე დღის წინ მედიისთვის გამართულ შეხვედრაზე FX-ის წარმომადგენელმა ვრცლად ისაუბრა იმაზე, თუ რაზე იქნება აქცენტი ახალი სეზონის სცენარში: აშშ-ის 42-ე პრეზიდენტის, ბილ კლინტონის სკანდალისა და მისი იმპიჩმენტის პროცედურის შესახებ 8 ეპიზოდს გადაიღებენ. სერიალის მესამე სეზონის სახელწოდებაც იმპიჩმენტი იქნება.

კლინტონის შემთხვევა თეთრი სახლის ისტორიაში ერთ-ერთი ყველაზე გახმაურებული სკანდალია: 22 წლის სტაჟიორმა, მონიკა ლევინსკიმ საჯაროდ აღიარა, რომ პრეზიდენტს მასთან რომანი ჰქონდა. ამის გამო კლინტონს იმპიჩმენტი გამოუცხადეს.

სერიალს ამერიკელი მწერლის, ჯეფრი ტუბინის ბესტსელერი წიგნის, A Vast Conspiracy-ის მიხედვით იღებენ. აღსანიშნავია, რომ ამ სეზონის შექმნაზე მუშაობს თავად მონიკა ლევინსკიც — ის შოუს პროდიუსერი იქნება.

რაც შეეხება სამსახიობო გუნდს, მათი ვინაობაც ცნობილია: მონიკა ლევინსკის პროტოტიპს აქამდე ძირითადად კომედიური როლებით ცნობილი ახალგაზრდა მსახიობი, ბინი ფელდშტეინი შეასრულებს.

ფოტო: Getty Images

პრეზიდენტ ბილ კლინტონის როლში კლაივ ოუვენი მოგვევლინება.

მესამე სეზონში ასევე ვიხილავთ ამ სერიალის მაყურებლებისთვის კარგად ნაცნობ სახეს — სარა პოლსონსაც, რომელიც ლინდა ტრიპის პროტოტიპს განასახიერებს.

ლინდა მონიკა ლევინსკის თანამშრომელი და მესაიდუმლე იყო, რომელმაც ამ გახმაურებულ ისტორიაში თავისი წვლილი შეიტანა.

ფოტო: Getty Images

Impeachment: American Crime Story-ში ვიხილავთ კიდევ ერთი ქალის, პოლა ჯონსის ისტორიას, რომელმაც ბილ კლინტონს სასამართლოში სექსუალური შევიწროების ბრალდებით უჩივლა.

მის როლს ანალეი ეშფორდი შეასრულებს.

ფოტო: Getty Images

ჟურნალისტი მეთ დრადჯის როლს, რომელმაც პირველმა გაავრცელა ინფორმაცია მედიაში კლინტონის სკანდალის შესახებ, American Horror Story-ის ვარსკვლავი, ბილი აიკნერი მოირგებს.

ფოტო: Getty Images

ხოლო მწერალსა და ადვოკატს, ენ კოულტერს, რომელმაც ბილ კლინტონის სკანდალის შესახებ გახმაურებული წიგნი დაწერა, ბეტი ჯილპინი განასახიერებს.

ფოტო: Getty Images

აღსანიშნავია, რომ რამდენიმე კვირის წინ აშშ-ს ამჟამინდელ პრეზიდენტს, დონალდ ტრამპსაც გამოუცხადეს იმპიჩმენტი, სულ რამდენიმე თვეში კი ამერიკის საპრეზიდენტო არჩევნებია. შოუს შემქმნელებს სურთ, რომ ახალი სეზონის პრემიერა სწორედ არჩევნების წინ შედგეს.

არაერთი ემის მფლობელი სერიალის, American Crime Story-ის პირველი სეზონი ამერიკელი სპორტსმენის, ო. ჯეი. სიმფსონის ცოლისა და ბოიფრენდის მკვლელობას ეხებოდა, მეორე სეზონში კი ცნობილი დიზაინერის, ჯანი ვერსაჩეს მკვლელობის ისტორიას გავეცანათ.