პრემიერ-მინისტრი გიორგი გახარია ოთხი ამერიკელი კონგრესმენის კრიტიკულ წერილს ეხმაურება. ტელეკომპანია იმედის ეთერში კომენტარისას პრემიერმა აღნიშნა, რომ საქართველოს მთავრობა მზადაა ყველა თემაზე "მშვიდად და წყნარად" ისაუბროს პარტნიორებთან ერთად:

"შეიძლება, წერილები არ არის ის ფორმა, რომლითაც უნდა საუბრობდნენ სტრატეგიული პარტნიორები და მეგობრები. ჩვენ არანაირი პრობლემა არ გვაქვს, რომ ყველა სახის შეფასება, თუნდაც მწვავე, სამართლიანი, შეიძლება, ჩვენი გადმოსახედიდან უსამართლო, დავსხდეთ და განვიხილოთ, რასაც გავაკეთებთ უახლოეს პერიოდში. ისიც კარგად უნდა გვესმოდეს, რომ რანაირი მოტივებიც არ უნდა არსებობდეს, მსგავსი წერილების ან მსგავსი ქმედებების ან შეფასებების მიღმა, ჩვენ გვჯერა, რომ ესაა გულწრფელი ნაბიჯები იმ მეგობრობის და საქართველოს დემოკრატიული პროცესების მხარდასაჭერად, რომელსაც დარწმუნებული ვართ, რომ აშშ მხარს უჭერს. შეიძლება შეფასებებში იყოს გარკვეული სუბიექტური მომენტები", — თქვა პრემიერ-მინისტრმა.

აშშ-ის კონგრესის წარმომადგენელთა პალატის ოთხმა წევრმა, მათ შორის, საქართველოს ჯგუფის თანათავმჯდომარეებმა, პრემიერ-მინისტრს, გიორგი გახარიას გუშინ, 21 იანვარს, მორიგი წერილი გამოუგზავნა. კონგრესმენები გახარიასთვის მიწერილ წერილში შეშფოთებას გამოთქვამენ საქართველოში არსებული პოლიტიკური მოტივით დევნისა და ეკონომიკური ვარდნის ტენდენციის გამო.

კონგრესმენებმა გიორგი გახარიას წერილი ერთი თვის წინ, დეკემბერშიც გამოუგზავნეს, სადაც პროპორციულ სისტემაზე გადასვლის დაპირების შეუსრულებლობას აკრიტიკებენ და გაოგნებას გამოხატავდნენ.