უეს ანდერსონი ერთ-ერთი ყველაზე ცნობილი ამერიკელი რეჟისორია, რომელიც მუდმივად გამორჩეული თხრობის სტილისა და ვიზუალის მქონე კინოსურათებს ქმნის. რეჟისორის ჯერჯერობით ბოლო ნამუშევარი 2018 წელს გამოსული ანიმაციური ფილმი Isle of Dogs-ია, რომელმაც ოსკარისა და ოქროს გლობუსის დაჯილდოების ნომინაციები დაიმსახურა.

როგორც ცნობილია, უეს ანდერსონი ახალ ფილმზე — The French Dispatch-ზე მუშაობს. ფილმის პრემიერა, სავარაუდოდ, ამ წლის ბოლომდე შედგება, თუმცა მის შესახებ თითქმის ყველაფერი გასაიდუმლოებულია.

თავდაპირველად გავრცელებული ინფორმაციის თანახმად, ფილმის ქრონომეტრაჟი 4-საათიანი უნდა ყოფილიყო, თუმცა შემდგომში ეს ინფორმაცია უარყო ფილმის მწარმოებელმა კომპანია Searchlight Pictures-მა და ოფიციალურად განაცხადეს, რომ ახალი ფილმი ანდერსონის სხვა ფილმების მსგავსი ხანგრძლივობის იქნება: დაახლოებით 2 საათი.

ასევე ცნობილია, რომ ფილმის ბიუჯეტი $25 მილიონს შეადგენს — დაახლოებით იმდენივე, რაც Grand Budapest Hotel-ის გადაღება დაჯდა. ეს ორივე ფილმი უეს ანდერსონის ყველაზე ძვირად ღირებული სურათებია The Life Aquatic with Steve Zissou-ის შემდეგ, რომლის ბიუჯეტიც $50 მილიონი იყო.

რეჟისორის ერთგულ ფანებს განსაკუთრებულად აღაფრთოვანებთ სამსახიობო გუნდი, რომელიც ერთმანეთზე უფრო კაშკაშა ჰოლივუდელი ვარსკვლავებითაა დაკომპლექტებული: ფრენსის მაკდორმანდი, ბილ მიურეი, ტიმოთი შალამე, ტილდა სუინტონი, სირშა რონანი, ქეით უინსლეტი, კრისტოფ ვალცი, ედრიენ ბროდი, ელიზაბეტ მოსი, ჯეფრი ვრაიტი, უილემ დეფო, ოუენ უილსონი, ლეა სედუ და ბენისიო დელ ტორო.

მართალია, ფილმის სრული შემადგენლობის შესახებ თითქმის ყველაფერი ვიცით, თუმცა მხოლოდ მწირი ინფორმაციაა ცნობილი სცენარის შესახებ: ოფიციალურად გავრცელებულ ერთწინადადებიან აღწერას თუ დავეყრდნობით, სიუჟეტი გამოგონილ ფრანგულ ქალაქში განვითარდება და სამი სხვადასხვა ისტორიის შესახებ მოგვითხრობს.

როგორც ცნობილია, ფილმის სცენარი წიგნადაც გამოიცემა, რომლის შეძენაც ამ წლის 21 მაისიდან იქნება შესაძლებელი, რაც საფუძვლიან ეჭვს აჩენს, რომ ფილმის პრემიერა მანამდე, სავარაუდოდ, კანის 73-ე კინოფესტივალზე შედგება, რომელიც 12-23 მაისს გაიმართება.