ამერიკის ყოფილი ვიცე-პრეზიდენტის, ჯო ბაიდენის მრჩეველი თავდაცვის საკითხებში, მაიკლ კარპენტერი აცხადებს, რომ საქართველოს მთავრობამ კონგრესმენების კრიტიკა სერიოზულად უნდა მიიღოს. მისი თქმით, ეს არის ორპარტიული გაფრთხილება ნეგატიურ ტენდენციებზე, რომელსაც საქართველოს მეგობრებისგან იღებენ.

საქართველოს პრემიერისთვის მიწერილ წერილში კონგრესმენები ეხმიანებიან სხვადასხვა საკითხს, მათ შორის ანაკლიის პორტს, ოპოზიციის ლიდერების წინააღმდეგ მიმდინარე გამოძიებებსა და არჩევნებს.

დასაწყისში კონგრესმენები აღნიშნავენ, რომ პირველი წერილის შემდეგ გახარიასგან მიიღეს პირობა არჩევნები უმაღლესი სტანდარტით ჩატარების შესახებ. თუმცა მათი თქმით, აქვთ ინფორმაცია იმაზე, რომ ფეისბუქმა წაშალა ანგარიშები, რომელსაც მმართველი გუნდი აფინანსებდა. კონგრესმენებს მიუღებლად მიაჩნიათ ის ფაქტი, რომ ამ გვერდებზე ვრცელდებოდა ანტიდემოკრატიული და ანტიდასავლური განცხადებები.

გარდა ამისა, კონგრესმენები აცხადებენ, რომ ამერიკულ და ევროპულ კომპანიებს საქართველოში ავიწროვებენ, რაც აშშ-ში საქართველოს იმიჯზე უარყოფითად აისახება. ამასთან დაკავშირებით, ისინი შეშფოთებას გამოთქვამენ ანაკლიის პორტის საკითხის პოლიტიზების გამო. მათი თქმით, აშშ-ს მხარდაჭერის მქონე ანაკლიის კონსორციუმის პოლიტიკურ სამიზნედ ქცევამ აშშ-ს ინვესტიციებს შეუშალა ხელი.

კონგრესმენები შეშფოთებას გამოთქვამენ იმის გამოც, რომ განახლდა ძველი საქმეები ოპოზიციის ლიდერების წინააღმდეგ.

წერილის ბოლოს კონგრესმენები იმედს იტოვებენ, რომ საქართველოს მთავრობა გააგრძელებს მუშაობას ამერიკის კონგრესთან, ახალ ელჩ კელი დეგნანთან, ევროკავშირთან და არასმთავრობო ორგანიზაციებთან ერთად რომ გააძლიეროს დემოკრატიული ინსტიტუტები და ააყვავოს ეკონომიკა ქართველი ხალხისთვის.

კიდევ ერთი კონგრესმენი, რომელმაც გახარიას 13 იანვრით დათარიღებული წერილი გამოუგზავნა რესპუბლიკელი მარკვეინ მალინია. მალენიც დემოკრატიული ღირებულებებისგან გადახვევისა და ეკონომიკური მდგომარეობის გაუარესების გამო თავის შეშფოთებას გამოხატავდა. ასევე, დაპირებული რეფორმის შეუსრულებლობასთან დაკავშირებით მისი კოლეგებს აზრს იზიარებდა.

მმართველ გუნდის წევრებმა კონგრესმენების კრიტიკა მიკერძოებულობას დააბრალეს და განაცხადეს, რომ ისინი სახელმწიფო დეპარტამენტის განცხადებებს ეყრდნობიან.

გაიგეთ მეტი: